SA IKADUHANG HIGAYON, mibalik ang Festival of Services sa lungsod sa Asuncion, ang “one-stop-shop” sa halos usa ka gatos nga serbisyo sa probinsyal nga panggamhanan sa Davao del Norte dala ni Gobernador Anthony del Rosario uban ang pipila ka nasyonal nga ahensya, Nobyembre 5-9, 2018.

Kahinumduman nga niadtong Abril 23-27, 2018, 6,240 ka lumupyo sa Brgy. Concepcion, Sagayen, Concepcion, Pamacaun, New Loon, Napungas ug silingang dapit ang naserbisyohan sa unang pag-abot sa Serbisyo Caravan sa maong lungsod.

Gipasabot ni Asuncion Mayor Yuri Dayaday nga ang hatod serbisyo ni Gob AGR walay gipili bisan unsa pa ang partido.

“Daghan miadto sa balay. Meyor naa mi problema sa legal, sa health, sa agriculture. Ingon ko karong Lunes adto mo tanan didto sa central elementary school kay naa didto ang tanang services gihatod. Kay ang gusto ni Governor del Rosario ang katawhan sa Asuncion dili na maghago, kay gusto niya one-stop-shop ihatod dire mismo. Kadtong wa pa mahibalo palihug ingna inyong mga silingan lima ni ka adlaw nga Festival of Services. Masabtan ninyo si Governor del Rosario dili tinuod nga walay nahimo. Daghan siya’g nahimo pero wala kakita ang uban. Nakita nato kining serbisyo. Ang serbisyo alang sa tanan—ma-Hugpong, ma PDP,” matod ni Mayor Dayaday atubangan sa mga mitambong gikan sa barangay Cambanogoy, Cabaywa, Buclad, New Bantayan ug Magatos.

Gipasabot sab ni Senior Board Member Rodolfo ‘Rodney’ del Rosario nga pwedeng magbalik-balik alang sa bisan unsang klase sa serbisyo.

“Itong Festival of Services lima ka araw to, sana naman makatabang sa inyo. Daghan mga serbisyo gihandog ng atong probinsya na ina-rrange ng ating pinalanggang gobernador kauban ang mga department heads. I-maximize nato mga serbisyo. Pwede mo magbalik-balik dire. Kung karon adlaw dili mahuman balik kayo ugma hanggang sa Byernes ang last day,” pag-awhag ni Senior Board Member del Rosario, Jr. 

Gipasabot sab ni Board Member Raymund Joey Millan nga ang pagpaduol sa serbisyo-publiko pangunang programa sa administrasyon.

“Sa Asuncion second round na. Ingon ni Gob imbes kamo’y moadto sa probinsya, ang probinsya maoy gipaduol diha sa inyoha. Ug kini nga programa magbalik-balik ni siya kay mao ni ang major flagship program sa del Rosario nga administration,” esplikar ni Board Member Millan.

Ilawom sa administrasyon ni Gob AGR, makaduha na sa usa ka bulan gihatod ang Serbisyo Caravan.

“Mao gyod na ang among ginabuhat every other week, twice a month naa mi ginahimo. Kay ang tuyo man gyod nato matod pa sa atong mahal nga presidente Digong Duterte, iyang gusto nga dili na ipalisod ang tao makadawat ug serbisyo sa gobyerno. Kung dili ta moadto sa katilingban, ang tao moadto pa sa layo nga Kapitolyo, mogastos pa ug pamilite, mopila-pila pa, mobalhin-balhin ug laing opisina. Dire gidala namo sa usa ka lugar para ang kinahanglan ninyo adtoan naa lang dinhi, baktas lang gamay dire lang tanan. So mao na ang tuyo nato, one-stop shop,” pasabot ni Gobernador Anthony del Rosario.

Gikan niadtong Pebrero 2018, 68,110 na ka tao ang nakadawat serbisyo gikan sa lain-laing departamento sa DavNor Kapitolyo uban sa pipila ka nasyonal nga ahensya sa AFP, PNP, Provincial Prosecutors Office, TESDA, PAO, LTO, DSWD, DFA, PSA, COMELEC, DENR, DA, DRMC ug DOH.

DavNor News