SA UNANG HIGAYON, mikuha ug “Student Permit” (SP) alang sa pag-drayb ang sobra 150 way lisensyang drayber sa Asuncion atol sa paghatod serbisyo sa Land Transportation Office (LTO) dala sa BEST PEOPLE Festival of Services ni Gobernador Anthony del Rosario.
Si Julieto Lintuan nga usa ka empleyado sa LGU Asuncion mga napulo na ka tuig nga nag-drayb nga way lisensya bisan gani SP.
“Nag-drayb, 10 years seguro. Karon ra ko. Bag-o ra man gud kakuha’g motor pod,” pag-angkon ni Julieto nga sa una nagmaneho na ug hinulaman nga motorsiklo bisan walay lisensya.
Iyang giangkon nga gawas sa kahadlok nga madakpan, ang disgrasya mas labaw nga iyang gikahadlokan.
“Nahadlok gud. Amping lang. Wala pa (madakpi). Amping lang gyod nga di maka-disgrasya,” pag-angkon sa trabahante sa LGU Asuncion.
Dakong pasalamat ni Julieto sa administrasyon ni Gob AGR nga gipaduol ang serbisyo LTO sa iyang gitrabahoan.
“Maayo kay naa na sa duol, di na ta mahasol moadto sa layo. Dakong pasalamat jud sa iyaha nga nahatagan ta dire. Mga tambal, daghan gipanghatag niya. . Dakong pasalamat jud ko ani (LTO) kay naa man siya sa duol, di na pod ta mahasol sa pagkuan nato. Di na ta mahadlok moadto ug laing lugar di na man ta maharang, di na man ta masita, di ma-delay atong biyahe.”
Si Rolando Corpuz, 29-anyos nga taga Purok Saranay, Kamuning, Asuncion sobra na sab 10 ka tuig nag-drayb ug sa primerong higayon mikuha ug student permit. Gitug-an sab ni Rolando nga nahadlok siya tungod kay way lisensya.
“Hadlok, hadlok pod mao ganing nagkuha ko karon,” matod ni Rolando.
Gawas ni Julieto ug Rolando, pipila ka mga babayeng trabahante sa LGU Asuncion nga dugay nang nag-drayb ang nagpahimulos sa serbisyo LTO nga naghangyo nga dili na lang ibutyag ang ilang mga ngalan.
Niadtong Oktubre 22-23, 2018, gihatod sab ang serbisyo LTO sa lungsod sa Kapalong diin sobra 200 way lisensyang drayber ang nakapahimulos.
Katuyoan gayod sa gobernador nga ipaduol ang halos usa ka gatos nga serbisyo gikan sa DavNor Kapitolyo ug ubang nasyonal nga ahensya ngadto sa katawhan aron sila makadaginot ug panahon, kusog ug ilabina kwarta.
Limitado ang gikahatag serbisyo LTO Tagum sanglit nagkinahanglan ug mga ekipo ilabina ang pag-rehistro sa mga sakyanan.
