LPTRP 2019-2023 aprobado sa DavNor PDC

APROBADO sa Davao del Norte Provincial Development Council (PDC) ang Local Public Transport Route Plan (LPTRP) 2019-2013 subay sa Omnibus Franchising Guidelines (OFG) sa Department of Transportation (DOTr) ug usa sa mga kinahanglanon alang sa Public Utility Vehicle (PUV) Modernization Program atol sa binulan nga miting Martes, Nobyembre 13.

Ang LPTRP maoy detalye sa ruta, mga pasilidad ug matang sa sakyanan lakip na ang mga terminal aron itagana ang publikong serbisyo sa pagbiyahe base sa panginahanglan sa mga pasahero ug magsilbing basehanan sa komprehensibong lokal nga plano sa mga syudad ug lungsod sa probinsya.

Sa paghimo sa LPTRP, gihatagan ug konsiderasyon ang presente nga kahimtang sa mga karsada ingon man ang ruta sa mga publikong sakyanan.

Sa gi-aprobahan nga plano, ang kasamtangang ruta sa mga sakyanan gipalambo pa sa LPTRP pinaagi sa pag-interkoneksyon sa mga LGU ug sa gawas sa probinsya. Aprobado sab sa DavNor PDC ang plano alang sa dugang bag-ong 3 ka ruta sa bus; 23 alang sa Jeep pampasahero ug 3 alang sa Utility Vehicle (UV) Express Service (point-to-point) sa sulod ug gawas sa Davao del Norte.

Ang gipasar nga LPTRP iduso ngadto sa Sangguniang Panlalawigan alang sa pag-aprobar niini una pa kini isumiter ngadto sa DOTr ug LTFRB.

Sa kasamtangan, bisan kung walay pagtugot sa Land Transportation Franchising Regulatory Board (LTFRB) nga mamasahero, daghang motorsiklo (habal-habal) ang nahimong “pang-pasahero” tungod sa kakulang sa publikong sakyanan ilabina sa hilit nga mga dapit sa probinsya.


 

More Davnor Updates at

DavNor Karon

 

DavNor News