Serbisyo Caravan gihatod gyod sa Brgy Sawata, San Isidro

TUNGOD kay daghan ang wala makadawat sa mga serbisyo atol sa unang pag-abot sa Festival of Services Oktubre 8-12, 2018, gihatod gayod ni Gobernador Anthony del Rosario ang halos usa ka gatos nga serbisyo mismo sa sentro sa Brgy Sawata, San Isidro, Davao, del Norte.

Kahinumduman nga sa maong petsa, miabot ang Festival of Services didto sa Igangon ug alang sa mga barangays Sabangan, Sawata, Kipalili ug Sto. Niño apan tungod sa wala pagpahibalo ug pagpanghadlok, daghan ang wala makapahimulos sa lima ka adlaw libreng serbisyo ilabina ang serbisyo panglawas.      

“Amo gyong gisegurado nga bag-o mag-pasko makaanhi gyod mi sa Sawata para ang tanang katawhan dinhi makatilaw gyod ug serbisyo gikan sa probinsya sa Davao del Norte. 80 kapin ka mga serbisyo ginahatag, 5-days gyod na siya. Mao ni ang among tuyo nga dad-on gyod ni siya dili lang ang sa probinsya apil na ang pipila ka mga national agencies. Kung kinahanglan ninyo mag-paibot naay dental, kung kinahanglan magpa-check-up, kung gusto mo magpa-vaccinate ng iro pwede pod, magpa-renew ug lisensya kay expired, so kana nga mga serbisyo libre na tanan tungod sa atong mga programa sa Festival of Services,” pasabot ni Gobernador Anthony del Rosario atol sa pagbukas, Lunes, Nobyembre 19.

Katuyoan ni AGR nga makadaginot ug kwarta, panahon ug kusog ang mga Dabaonon.

“Gidala namo dire para dili namo mogastos ug pamilite paingon didto sa Tagum. Ang among gibuhat kami na lang ang nag-anhi para mohatag ug serbisyo kaninyong tanan dinhi sa Sawata ug sa mga silingan barangay. So ayaw gyod sayanga ang oportunidad. Kung naa mo’y mga conflict sa schedule ire-schedule lang na tanan kay sayang kaayo lima lang mi ka adlaw dire sa Sawata Elementary School. After two weeks mobalhin na pod mi. Ang among ginapangandoy nga pag-abot sa panahon tanan gyod barangay sa Davao del Norte among maadtoan para matagaan ug serbisyo gikan sa gobyerno alang sa mga katawhan,” padayong pasabot sa Gobernador sa pagpaduol sa mga serbisyo.  

Ang Festival of Services ginahimo sulod sa lima ka adlaw nga pulos libre ang tanang serbisyo gikan sa probinsyal nga panggamhanan ilabina ang serbisyo panglawas.

“Naay Festival of Services handog ng ating probinsya pinaagi ng atong pinalangga nga governor AGR kauban ng kanyang mga department heads na naghanda ng serbisyo para kaninyong tanan. Kung gusto n’yo magpa-tupi, mag-renew ng lisensya, magpabunot ng ngipon, naa diha tanan. Lima ka adlaw itong festival of services, balik-balik lang mo araw-araw. Ipaabot nyo sa inyong mga silingan, mga kapamilya nga naay festival of services para ma-maximize ang benepisyo kaninyong tanan,” matod sab ni Senior Board Member Rodney del Rosario nga nagtug-an sa mga serbisyo lakip na ang minor surgeries sa mga  mga bukol o “cyst.”   

Wala limitahi ang Festival of Services alang sa taga Sawata lamang. Hinuon nangabot bisan ang nakadawat na niadtong Oktubre nga mga taga Igangon. Miabot sab ang taga Sabangan, Kipalili, Sto. Nino, Dacudao ug bisan taga Monte Dujali.


 

More Davnor Updates at

DavNor Karon

 

DavNor News