Mga ‘millennial’ buntis sa Sawata desidido magplano sa pamilya

GAWAS sa libreng mga serbisyo para sa nagmabdos, daghan pa gyod ug nakat-onan ang mga ‘Mama’ ilabina ang responsableng pagka-ginikanan (Responsible Parenthood) sa pagplano sa pamilya pinaagi sa Buntis Congress dala sa Festival of Services didto sa Sawata, San Isidro.

Sa matag Serbisyo Caravan gigahin gayod ang ikaduhang adlaw sa pag-atiman sa tanang buntis sanglit importante ni Gobernador Anthony del Rosario ang himsog nga panglawas. Ang letrang “O” sa BEST PEOPLE development agenda sa iyang administrasyon nagpasiugda ug “Optimum Health and Services” alang sa tanang Dabaonon nga nagpuyo sa Davao del Norte.

Usa si Rubilyn taga Purok Adman, Linao, Sawata, nagbuntis sa ilang unang anak nga gikuyogan pa gyod sa iyang bana nga si Francis Sauro aron motambong sa Buntis Congress niadtong Martes.

“Ulawon kaayo, giubanan na lang nako. Nagpasalamat ko sa ilaha tungod ani nga serbisyo tungod kay ang mga buntis, ang mga first timer matabangan gyod nila gikan pa first baby ug naa po’y makat-onan ba sa ilang mga programa ing-ani. Tagsa ra kayo ni mao nga amo nang gi-anhi diria,” matod ni Francis nga mapasalamaton sa gidala nga Serbisyo Caravan.

Nagpasalamat sab si Rubilyn ug gipaneguro nga kutob lang gyod duha ang mahimong anak.

“Salamat kaayo, salamat,” maulawon mubong tubag ni Rubilyn.

Si Sheryl Gole nga taga Dacudao nagbuntis sa ilang ikaduhang anak nagpahayag sab sa iyang nakat-onan uban ang pasalamat.

“Palanggaon siya’g maayo para mahimsog. Nagpasalamat mi nga gitabangan ming mga buntis para kaayohan sa tanang buntis kay lisod man gud. Planohon tama ra ning duha kay kapoy,” matod ni Sheryl nga naneguro nga duha lang gyod ka anak ang ilang ipatungha.

Bisan si Gerdalemae nga taga Panacan ug naminyo sa taga Dacudao dagha’g nakat-onan ug desidido nga kutob lang duha ka anak.

“Daghan. Kanang pag-atiman samtang buntis. .  Dako kaayong pasalamat kay dako ni’g ikatabang sa amoa, pait kaayo. . . Duha ra,” matod ni Gerdalemae.

Si Gladys Altizo gikan sa layong barangay Monte Dujali nagmabdos sa unang anak daghan sab ug nahibaloan ug gustong usa lang gyod ang ilang anak.

“Naa, sa mga activities gihatag sa amoa mga buntis. Dako kaayo mi’g pasalamat kay daghan mi’g nakat-onan para sa amoa. Isa lang kay lisodlisod,” matod ni Gladys.

Si Aireen nga taga Purok 30, Sawata wala gyod kalimti ang mga simtomas nga nagkinahanglan ug pag-adto dayon sa health center nga nagplano nang daan nga kutob ra gyod duha ka anak.

“If ever mag-bleeding kailangan moadto sa health center, kung magsakit ang tiyan. Nagpasalamat ko’g dako kang Governor AGR sa paghatag ug serbisyo dire sa Sawata,” matod ni Aireen.

Ang tanang mabdos makadawat gikan sa prenatal (apil ang ultrasound, x-ray) hangtod na sa post-partum nga mga serbisyo ug ang tanang buntis gihatagan ug libreng maternal kits.


 

More Davnor Updates at

DavNor Karon

 

DavNor News