BILIB gayod si Gobernador Anthony del Rosario (AGR) sa mga daycare centers dinhi sa Davao del Norte nga human mosaad ug mi-deliver ug mga tv sets sa mga eskwelahan, apilon pod paghatag ang tanang daycare centers sa tibuok probinsya aron daling makakat-on ang mga kabataan.

Kini human nga ang iyang kinamanghoran anak babaye bisan wala pa’y duha ka tuig ang edad, mipakita na sa iyang mga nakat-onan sulod lamang sa upat ka bulan nga pagtungha.

“I would like to talk about personal experience pag-abot sa child development center dinhi sa atong probinsya. Earlier this year, kining kinamanghoran nako nabalaka mi sa akong asawa kay mora’g di man siya mo-estorya. Gipadala namo siya sa doctor para ma-check kung duna ba’y problema. Unya niingon ang doctor dapat gyod mabutang gyod siya sa usa ka eskuylahan para maka-socialize pod siya sa mga bata ug para makatuon pod siya mag-estorya.  Kini si Julia wa pa ni nag-two gisulod na namo sa National Child Development Center. Kanang National Child Development Center under na siya sa Department of Social Welfare and Development, open to the public. So we enrolled her last July,” saysay ni Gob AGR nga naghisgot nga sa Davao del Norte adunay 542 child development centers ug 29,579 ka mga bata niini nga tuig, ang pinakadaghan sa tibuok Rehiyon XI.

Midugang ang gobernador nga sulod lang sa mubong panahon dako na kaayo’g kausaban ang iyang anak.

“Upat ka bulan lamang tabian na kaayo ni siya. Daghan na siya’g natun-an sa maong center and that is why makaingon jud ko bilib jud ko sa mga daycare centers dinhi sa Davao del Norte,” pagdayeg sa gobernador.

Ug aron matabangan ang mga bata ug mga magtutudlo, gipalapad pa ni Gob AGR ang iyang paghatag ug mga tv sets ug portable sound system dili lang sa mga eskwelahan kundili lakip na ang tanang daycare centers.

“Ug tungod kay nabilib naman ko sa inyohang tanan, naa ko’y gamay’ng sorpresa. Seguro gwapo kung atong hatagan ug tv ang mga daycare centers. Kay dinhi man gud sa District I, kay personal man ni nga kwarta nako, ang mga eskwelahan sa Asuncion natagaan na namo ug tv kada classroom. Naa na’y sa Kapalong ug uban pang local government units nangayo’g tv. Dakodako na nga gasto pero mao man na’y makatabang sa mga bata, willing pod ko mohatag. Naa na ko’y gi-commit nga 2,900 nga tv dinhi sa Distrito I para sa elementary ug high school. So 542 daycare centers, buot ipasabot 542 ka tv. Dili lang ni District I province-wide na gyod ni, apil pod ang district II,” pasalig ni Gob AGR uban ang pahinumdum nga maghulat lang kay nahutdan ug stocks ang iyang supplier.

Ingong amahan sa mga anak ug usab sa probinsya, importante gayod sa gobernador ang edukasyon.

“Of course sa daycare centers mas paspas makatudlo kung naa gyod na sa tv. So mao na ang nakita namong benepisyo sa tv. Ug ako isip usa ka amahan ug nagtuo nga importante gyod ang edukasyon sa mga bata, ngita gyod ug pamaagi para makahatag gyod ug kaayohan sa tanang mga eskuylahan ug daycare centers,” rason sa gobernador tungod sa nagakabag-o nga panginahanglan sa edukasyon.

Gawas nga gipalambo ang mga imprastruktura ug pagtudlo, gipatas-an sab sa gobernador ang “stipend” sa mga Child Development Workers (daycare teachers) ngadto sa P5,000 gawas pa sa dugang edukasyon ug libreng training nga ilang madawat.

Tumong sab ni Gob AGR nga magpapili pagka-congressman karong 2019 piniliay nga magpasa ug balaodnon aron kopyahon ang mga maayong nahimo sa Davao del Norte alang sa kalamboan sa mga kabataan sa tibuok nasod.

DavNor News