Barangay functionaries gitapok alang anti-illegal drug advocacy

GITAPOK sa Davao del Norte Department of Interior Local Government (DILG) ang mga barangay functionaries sa Tagum City, New Corella, Kapalong, Panabo City ug Carmen alang sa usa ka adlaw nga simposyum sa National Advocacy on Anti-Illegal Drug component 2 didto sa Molave Hotel, Nobyembre 27.

“Ang numero unong mando sa atong presidente is duha lang: Ma-minimize or ma-stop ang corruption ug all-out-war against drugs. Apil mo diha. So isip barangay official ato ning hunahunaon nga dili ni siya kinomedya lang sa atong presidente. Kung pananglit wala ma-agapi, ma-check dayon ang influence sa droga, malagmit 10 years from now, puro na way buot ang mga tawo sa Pilipinas. Ngano man? Naa na’y mga produkto sa Luntaing Paraiso,” matod ni DILG Provincial Director Abito Bernasor nga nagtumong sa rehabilitation center sa probinsya nga naglangkit sa tanang hut-ong sa mga tawo lakip sa tigulang.

Gihagit pa sa probinsyal DILG director ang mga partisipante kung gustong masulayan ang epekto sa illegal nga droga labina ang shabu.

“Nganong ato man ning likayan? Kabalo mo unsa’y tubag ana. Sulayi gud ninyo. Magsunog ta’g marijuana, shabu atong tapok-an. Hanggabon natong aso tan-awon nato kung katuod pa ba mo sa inyo mouli. Ing-ana ang epekto sa droga. So kung ing-ana ang epekto, nganong ato pa man nang sudlan?” padayong pasabot ni PD Bernasor nga nagtumong sa sunogon kumpiskadong shabu ug marijuana atol sa simposyum.    

Si Philippine Drug Enforcement Agency (PDEA) Regional Director Antonio Rivera dugang nagpasabot nganong importanteng gipa-apil ang mga barangay opisyal ug nag-ngalan pa sa mga materyales nga himoong shabu. 

“Naa man mo dire sa grassroots, drug war will start and end at the barangay, ang gyera sa droga diha gyod na mag-umpisa sa atoang tugkaran ug diha pod na mahunong sa atong tugkaran. . Unsa man ning shabu? Nganong gitawag man na siya’ng poor man’s cocaine? Kanang cocaine plant-based na siya, makuha sa coca leaf. Karon kay mahal man ang cocaine naghimo sila’g chemical-based cocaine mao nang gitawag nato ug shabu. Isa ka chemical sa paghimo’g shabu kanang tubig sa baterya. Tapos kanang panglimpyo nato sa atoang CR nga muriatic. Panglimpyo nato sa atong kuko, acetone. Mao nang inyohang simhoton, ma-absorb sa atong utok, unsa may mahitabo sa atong utok?” esplikar ni PDEA XI Director Rivera.

Gipasabot sab sa PDEA director nganong ang mga pobre ang dakong apektado.

“Nganong ang kasagaran mamatay kanang pobre? Nganong diha man nag-breed sa pinakaubos nga sektora sa atong gobyerno? Gitawag gani na’g poor man’s cocaine, kinsa’y gagamit ana? Atong mga pobre. Nganong gitawag na siya’g poor man’s cocaine, kay barato. Karon lang ningmahal. Sa una makapalit ka, ang 1 gram sa shabu P1,500 or P1,000. Karon pila na? Ang usa ka gramo modagan na P10,000 to P12,000. Mao nang rason bisag unsaon nato’g kampanya di gyod na moundang kay dako kaayo ang profit,” esplikar ni Rivera.

Giangkon sab sa PDEA XI director nga giknahanglan gyod nila ang kooperasyon gikan sa taga barangay.

“Unsaon nato na pagpakgang? Dire sa Region XI, 538 ang affected out of 1,162 ka barangay. Pila karon ang clear? 189 pa lang ka barangay. Kami sa PDEA dili namo ni kaya undangon. Magtinabangay ta para mahunong nato ang illegal drugs diha sa inyoha. Kung wala mo walay mahimo ang inyohang kapolisan, kasundalohan ug ang inyohang PDEA. Magsige lang na’g cycle--dakop, priso, gamit na sad, dakop, priso, gamit na sad,” padayong pasabot ni Rivera.

Pagkasunod adlaw (Myerkoles) nagpahigayon na sab ang DavNor DILG ug susamang kalihokan didto sa Island Garden City of Samal.


 

More Davnor Updates at

DavNor Karon

 

DavNor News