GIKAN sa hataas nga lugar sa Talaingod ngadto sa kadagatan sa Island Garden City of Samal, miabot ang Serbisyo Caravan Festival of Services (FoS) sa Tagum City.

Sa pagbukas 5-adlaw nga FoS niadtong Lunes, Disyembre 3, gipasabot ni Gobernador Anthony del Rosario ang rason. 

“Kining programa nato sa probinsya dugay na namo gisugdan. Pero tungod sa kadaghan sa barangay sa probinsya syempre kinahanglan atong tabangan tanan unya finally for the first time niabot na ta sa Tagum. Ug syempre giuna nato dinhi sa Visayan Village. Lima ka adlaw ni siya ang mga serbisyo gikan sa Kapitolyo ug gikan sa kaulohan,” matod ni Gobernador Anthony del Rosario nga nagpahibalo nga dunay 223 ka mga barangay sa tibuok probinsya nga parehas gihatdan ug mga serbisyo para sa tao ug bisan para sa hayop. 

Bisan sa panahon pa ni kanhi Gobernador Rodolfo del Rosario nga gitawag RDR WHEELS, ang paghatod paduol sa mga serbisyo sa Kapitolyo gihimo na gipadayon lang sa kasamtangan nga administrasyon aron makadaginot ug kusog ug kwarta ilabina ang lagyo nagpuyo nga mga Dabaonon.

Gidayeg ni Visayan Village Barangay Captain Alfredo “Dondon” de Veyra, Jr. O.D. ang pag-abot sa Serbisyo Caravan.

“Ang Caravan Festival of Services dili lang ni karon nahitabo, kadaghan na ni. Miabot na ni sila ug Talaingod, New Corella, Asuncion, bisa’g asa na lang ni. Gwapo nga practice sa probinsya sa Davao del Norte tungod kay ang probinsya miduol na sa mga tao para mohatag sa serbisyo sa atoa. Imbes nga kita ang moadto, mangita pa ta sa ilaha kung asa ilang opisina, so nahitabo karon nga sila na ang nagdala dire sa atoa mismo. Salamat kaayo kay isa mi sa inyong gipili nga beneficiary sa maong aktibidades,” matod sa kapitan sa pinakadako nga barangay sa Tagum City.     

Giawhag gani ni Senior Board Member Rodney del Rosario ang mga tag-iya ug hayop nga dalhon kini aron ma-ikonsulta sa mga beterinaryo.

“Kung may mga iro kamo, o mga iring, pwede n’yong dalhin dito para matingnan ng ating mga veterinarian doctors. Sultihan ninyo inyong mga ginikanan, mga silingan nga ang Festival of Services hanggang Friday,” awhag ni Board Member del Rosario.   

Kahinumduman nga gikan niadtong Pebrero 2018, sobra 108,000 ka hayop na ang naserbisyohan sa Provincial Veterinary Office gikan sa pagpurga (deworming) ug ilabina ang anti-rabies nga vaccine alang sa mga iro ug iring nga padayong gitunol ngadto sa mga tag-iya ug hayop hangtod ning pagsulat.

DavNor News