ARON MALIG-ON ug malikayan ang dili angay’ng problema sa pamilya, gusto gayod ni Gobernador Anthony del Rosario (AGR) nga mahimong legal ang tanang kaminyoon dinhi sa Davao del Norte.

Kini ang iyang gipasibaw nga mensahe atol sa reception program nga didto lang gihimo sa karsada atbang sa Maniki Barangay Hall sa lungsod sa Kapalong, Byernes, Disyembre 7.

“Kining atong programa, ang pagminyo ninyo, among ginabuhat kay kami sa probinsya ug ako isip amahan sa probinsya nagatuo nga importante, kinahanglan atong ipalig-on ang matag pamilya. Daghan kasagaran mag-live in lang kay mahal man gyod ang gastos magminyo. Magbayad pa mo sa gown, barong, sa munisipyo para sa certificate of marriage, sa simbahan; daghan kaayong bayronon. Busa ang uban kasagaran mag live-in na lang,” matod ni Gob AGR nga nagdetalye sa mga hinungdan nganong dili magpakasal.

Daghang suliran sab ang malikayan kung legal ang panagtipon sa magtiayon hinungdan nga mihimo ug aksyon si Gobernador Anthony kauban ang probinsya. 

“Usahay pag dunay problema, di na magkasinabot ang duha, tungod kay di man legal nagminyo dali lang mobulag. Syempre ang apektado mga bata na pod. Mao na ang atong ginalikayan, mao na naghimo ta ug ing-ani nga programa. Para di na mo mobalibad, gilibre na namo tanan. Ang mga sanina ninyo, bisan inyohang cake, ang mga papeles gikan sa munisipyo ug gikan sa simbahan libre gyod na tanan para kami makaseguro ma-legal na mo magpuyo sa usa ka balay dili lang dinhi sa Maniki,“ dugang pahayag sa gobernador nga gipalakpakan pag-ayo sa mga kinasal.

Ang legal nga kaminyoon maghimo sab nga subay sa balaod ang pagdawat ug mga programa gikan sa gobyerno.

“Kung dili mo legal, dili mo makadawat ug benepisyo. Pananglitan Philhealth, naa man na sa lalaki. Unya kung ang babae dili nimo legal nga asawa, dili siya pwede maapil sa Philhealth. Bisan mga anak ninyo problema pod. So mao na ang katuyoan nato dinhi sa probinsyal nga panggamhanan ug sa barangay Maniki,”

Gawas sa pahimangno nga pagtuman sa balaod sa gobyerno labot sa kasal, gipahinumdoman sab ni Gob AGR nga dili gayod kalimtan ang pag-ampo.

“Ayaw kalimti pod, kung gusto gyod ninyo malig-on inyong panag-uban ingong bana ug asawa, importante gyod ang pag-ampo sa Ginoo. Importante nga God-fearing ta, kay kung God-fearing ta, dili gyod nato biyaan ang atong mga partner,” pagdasig sa gobernador.     

Kun nganong sa “karsada” lang ang reception program sa Kasalan sa Maniki, gipasabot ni Kapitan Romy Estrada ang hinungdan uban ang dakong pasalamat.   

“Kining adlawa atong nadawat ang atong kadaugan diin inyong nadawat ang mga benepisyo ug programa sa atong gobernador. Dinhi lang nato ipahinabo kay dili na man ta kagamit sa atong Town Square, di na man ta kagamit sa atong gym. Nindot nga gitagaan ta ug mega tent sa atoang gobernador. Mao na nga nadayon ang programa dinhi. Among gipaabot gob ang kinasingkasing nga pasalamat sa tanan nga gihatag nimo nga kaayo,” matod ni Kapitan “Mimi” Estrada. 

Kap-atan ug pito (47) ka pares ang naghimong legal sa ilang kaminyoon didto sa simbahan ug gipadayon ang programa alang sa reception didto sa karsada atubangan sa Barangay Hall sa Maniki.

DavNor News