MIPAULI nga malipayon ang mga “abantero” sa pag-atiman sa panglawas dihang ilang nabati ang “gidoble” nga benepisyo gikan sa probinsyal nga panggamhanan sa Davao del Norte ug gikan sa personal nga gastos ni Gobernador Anthony del Rosario (AGR) atol sa 2018 DavNor Health Workers Congress Disyembre 11 sa taga District I ug Disyembre 13 sa District II.

“Ang akong pagyukbo sa atong mga barangay volunteers nga sa kanunay atong katambayayong sa maayong panglawas ug kalamboan sa atong katawhan. We have since prioritized the health program because a healthy people is the backbone of a strong economy,” ang parehas nga pagtimbaya ni Gob AGR sa halos duha ka libo nga BHWs sa Distrito I niadtong Lunes ug sobra 2,000 gikan sa Distrito II pagka Myerkoles.

Sa BEST PEOPLE development agenda ni Gobernador AGR nga gigiyahan sa Abilidad at Malasakit (AMA) nga estratehiya, ang letrang “O” (Optimum Health Services) mas gipalapad. Gipalambo ang mga pasilidad sa tulo ka provincial hospitals sa Kapalong, Carmen ug IGACOS; gi-enrol sa Philhealth ang wala pa marehistro nga Dabaonon; ug, ang bag-o nga “zero billing” pinaagi sa “one-stop DavNor Malasakit Center” diha sa tanang hospital sa gobyerno. Ug aron gayod dili na maglisod ang naa sa hilit, gihatod pa gyod ang usa ka semana Festival of Services nga halos usa ka gatos nga serbisyo nga nakalibot na sa tanan syudad ug munisipyo ug nakaserbisyo na sobra 100,000 ka residente gikan niadtong Pebrero 2018.  

“Bago nako tiwason ang akong mensahe, gusto lang nako i-announce ang inyohang honorarium. Ang BHW karong tuig, today madawat ninyo ang P3,000. Ug bisan pa wala ako dinhi sa Kapitolyo sa 2019 kay nagdagan man ko’g congressman, ang trabaho nako kutob man lang sa June 30, 2019, karon pa lang kay nagsabot na mi ni Governor Rodney ug ni vice-governor Joey Millan nga next year ang inyohang honorarium doblehon na, mahimong 6,000,”matod ni Gob AGR nga gisugat sa naninggit sa kalipay nga mga BHWs .

Kumpyansa kaayo si Gob Anthony sa katakos ni Senior Board Member Rodolfo “Rodney” del Rosario nga modagan pagka gobernador sa 2019 nga ipadayon ang iyang nasugdan tungod ug alang sa kaayohan sa mga barangay workers.

“Ang atong mga Barangay Nutrition Scholars karong tuig ang inyong madawat P6,000. Kining mga Barangay Sanitary Inspectors sa una P1,500 ang ilang gidawat, karong tuiga 3,500 na. Ang atong mga Rapid Diagnostic Test Volunteers P4,000 pod ang inyong madawat karon nga adlaw ug ang atong Tuberculosis Informal Laboratory Workers P4,000 pod,” pag-isa-isa ni Gob AGR sa ilang madawat nga mga benepisyo.

“Gitaplan” pa sa gobernador ang para sa uban nga barangay volunteers aron “patas” ang ilang madawat.

“Ang atong mga Barangay Schistosomiasis Control Workers ang inyong madawat karon nga adlaw P1,200. Mora’g gamay kaayo ang Schistosomiasis no? Doblehon nako ni. . Schistosomiasis lang ha kay 1,200 man lang ang ilaha. Seguro imbes nga 1,200 himoon natong 3,000. . . Para lang kitang tanan malipay, kining 1,800 dili ni siya apil sa budget so ang buhaton nako aron ang tanan malipay ako na lang ang mobayad sa 1,800. Ang akong idugang nga 1,800 para lang sa Schisto workers aron moabot pod ug P3,000,” dugang paghugyaw sa tanan alang sa ilang kaubanang schisto workers volunteeer.

Ang mga Barangay Blood Coordinators nga wala ma-badyetan “gitaplan” pod ni Gob AGR lakip na ang mga barangay-paid BHWs nga wala mahatagi tungod kay dili pa “accredited” gumikan sa kakulangan sa training.

“Kinsa dire ang mga Barangay Blood Coordinators? Wala diay sila nahatagan ug bonus. So ako na lang ang magbigay ng P3,000 kay wala mo na-budgetan, gikan na sa akoa ang P3,000. Kasali ba ang barangay-paid BHW? Sila ba kasama sa P3,000? Dili pa diay mo accredited. Kadtong mga wala maapil kay dili pa sila accredited ipalista. . kay basin mapurdoy nako ani kay dili man ni gikan sa province, sa akoa man ni. Naa ko’y ihatag kaninyo, dili lang ko makasulti pila karon kay wala man ko kabalo pila mo tanan,” dugang ni Gob AGR nga halos dili na mabati tungod sa mas milanog nga hugyaw sa mga health workers.  

“Kaninyong tanan daghang salamat sa oportunidad nga gihatag ninyo kanako para mo-lead sa provincial capitol. Dili gayod nako malimtan kining tulo ka tuig nako nga panerbisyo isip gobernador sa atong lalawigan. Hinaut unta magpadayon lang gihapon ang inyong pagsuporta sa atong mga kauban sa partido,” pasalamat ni Gob AGR sa taga District II uban ang pasalig nga iyang dad-on pag-usab ang tingog sa mga BHW sa kongreso ug gamiton ang kasinatian isip best performing congressman aron mopasa ug mga balaod alang sa kaayohan sa mga barangay health workers sa tibuok nasod.

DavNor News