MISAKA ang gidaghanon sa mga tawo nga nataptan sa kagaw nga Human Immunodeficiency Virus (HIV) nga mitultol ngadto sa pagkahimong Acquired Immune Deficiency Syndrome (AIDS) nga sakit. 

Sa tibuok Rehiyon Onse, ang chartered Davao City dunay 2,558 nga kaso ug ikaduha ang probinsya sa Davao del Norte sa lima ka probinsya sa rehiyon nga dunay pinakadaghan nga nataptan sa HIV-AIDS nga miabot ug 345. Kini maoy 45% nga pagtaas gikan niadtong 2015 hangtod Agosto 2018.

“Ang akong ihatag is ang atoang probinsya. 1984 to August 2018 in Region XI is we have 3,322 reported cases, yung nagpa-test, yung na-confirmed positive. Ang iba wala pa naapil. Ang Davao del Norte ikaduha siya, naga-increase ang atong cases 345,” matod ni guest speaker nga si Erwin Espinosa atol sa convocation program, Lunes, Disyembre 17 didto sa RDR Gym.  

Gihisgotan sab sa guest speaker ang “ABCDE” nga nagpasabot ug “A”- Abstinence kun paglikay sa pakighilawas hangtod moabot sa husto nga panahon; ang “B” para sa mga minyo ug kini nagpasabot ug Be Monogamous, usa lang ka partner sa kinabuhi; “C”- Correct and consistent use of Condom and safer sex practices; “D”- Do not inject drugs; ug ang “E”- Education ug early detection aron malikayan ang HIV-AIDS.

Sa maong convocation, usa ka nataptan ug HIV-AIDS ang mipamatuod ug naghatag ug abanteng pasidaan ngadto sa tanan. Gidayeg ni Gobernador Anthony del Rosario ang “kaisog” nga gipakita.                                                                                                                                                        

“Most especially to Mr. Jose. It takes a lot of guts for somebody with AIDS to come out, to tell people that he has AIDS. . The only way not to spread it further is those mentioned ABCDE. Ano nga yung “A”? Abstinence, yun ang pinaka mahirap gawin. Ano yung letter “B”? Be faithful. Ah yun ang pinaka madali,” pagpasiugda ni Gobernador Anthony del Rosario.

Pinakadaghan sa mga nataptan sa HIV-AIDS mao ang mga lalaki-sa-lalaki nga pakighilawas nga miabot ug 158 samtang 126 lang ang lalaki-babaye-lalaki nga estilo sa pagkinabuhi. Ang lalaki-babaye lang pakighilawas ang pinakaubos nga 43 samtang ang uban nga nataptan maoy sa laing paagi sama sa paggamit ug mga hiringgilya alang sa pag-ineksyon (needle injections) o kaha pag-abono ug dugo.

Kung labot sab sa edad nga nataptan, ang 25-34 anyos mao ang pinakadaghan nga miabot ug 173 samtang ang edad 15-24 mao ang ikaduha nga dunay gidaghanon nga 121. 

Ang convocation nga gipasiugdahan sa DavNor Provincial Health Office nga nagbutang gayod ug dapit alang sa libreng HIV testing, dili maoy pagpanghadlok kundili aron tabangan ang mga nahimong biktima.

DavNor News