2,000 Dabaonon gi-libre sa “Pamaskong Pasaporte sa Davao del Norte”

MILANOG ang kusog nga pakpak ug singgit sa kalipay sulod sa RDR Gym dihang gipahibalo ni Gobernador Anthony del Rosario (AGR) nga LIBRE ang processing ug delivery fee sa 2,000 ka tawo nga nagkuha ug nag-renew ug passport pinaagi sa Pamaskong Pasaporte sa Davao del Norte, Huwebes, Disyembre 27. 

Ang maong kalihokan maoy usa lamang sa halos usa ka gatos nga serbisyo hatod sa Festival of Services nga gipahigayon diha mismo sa nataran sa DavNor Sports and Tourism Complex, Disyembre 26-29.

“First of all I’d like to thank Maam Kathleen Llarena for bringing the whole team here to Davao del Norte. Ato silang palakpakan kay gitagaan jud ta ug higayon nga mag-anhi sila para lang ma-proseso ang inyohang mga passports. Itong programang Passports on Wheels of course this would not happen if not the leadership of our President Digong Duterte,” matod ni Gobernador AGR nga nagtugon sab nga ipangumusta siya sa DFA Secretary ug kanhi congressman Teddy Boy Locsin.

Sa pagkuha ug bag-o ingon man pag-renew ug passport, ang isa ka tao kinahanglan mobayad ug processing fee nga P1,200 ug P150 alang sa delivery fee.

“Nangutana pod ko pila ang processing fee ninyo? Ingon sila 1,200 pesos. Kay Christmas man karon naka-desisyon ko isip gobernador sa Davao del Norte, libre na ang inyong processing. Dalaha ang resibo ninyo para ma-refund. . Lipay mo? . . Basta gani lipay mo bisan ako lipay pod,” malipayong pahayag ni Gob AGR.

Ang pamilyang Antonio ug Hope Villaganas nga taga Tagum City tulo ka gayod ka pasaporte lakip sa ilang anak.

“Planong magbakasyon sa ibang bansa. . . Dako kaayo among pasalamat kay naka-libre unya makatipid sa budget, unya sa hassle pod dili na moadto’g Davao, so nindot kaayong programa,” matod ni Antonio.

“Pasalamat jud mi kaayo kay less hassle na siya. Suwerte na pod kay nalibre na pod mi, wa mi magdahom libre diay,” matod ni Mrs. Hope.  .

Sila si Eleanor, Elaiza ug Anna Marie Pañales nga gikan sa Panabo City mapasalamaton ug malipayon tungod sa libreng pasaporte.

“Sus, wa jud mi nag-expect nga ing-ani libre gyod diay. Nagbayad pa mi didto, unya pag-abot namo dire gi-announce niya nga libre, daghannnn kaayong salamat kay AGR nga maka-refund mi sa among gibayad plus kadto pa gyong mailing, libre gihapon. Daghan kaayong salamat. Salamattttt jud kaayo kay Gov AGR sa iyang palibreng passport” matod sa inahan nga si Eleanor nga nagtug-an nga moadto sila ug Hongkong.

Si Maricel ug Marjorie Joy Marikit Digal mapasalamaton sab kaayo. 

“Thank you kaayo kay Governor unya sa province of Davao del Norte sa ing-ani nga programa. Unta magpadayon ni,” matod ni Maricel.

“Dako kaayong pasalamat. Pasalamat gyod mi’g dako sa iyaha, kay Gob ok kaayo,” matod sab ni Marjorie.

Si Bonifacio Tecson, Jr nga taga Talicud Island, IGACOS mibiyahe alang sa libreng pasaporte.

“Layo-layo jud akong naabtan, ako ning gipaningkamotan kay dako jud ning tabang sa akoa puhon-puhon makagawas ko,” matod ni Bonifacio nga nagplanong manarbaho sa Saudi Arabia.

Bisan ang lagyo nga taga Talaingod nangabot aron sab mo-aplay ug pasaporte, butang nga gikahimuot sa gobernador kay mismo iyang asawa wala niya masultihi sa dakong kalihokan dinhi.

“Naa lang ko gamay nga estorya. Ang kataw-anan ani my wife is in Manila renewing her passport. Pero nakalimot ko, naa diay Passport on Wheels karon nga adlaw. Unya wa pa jud nakadawat ug libre, kamo lang ang nakadawat ug libre. Sori na lang ang asawa nako. . Anyway Merry Christmas and happy new year,” panghinaut sa gobernador sa malipayong katawhan nga way langan naglinya dayon.   

Gawas sa processing ug delivery fee, gi-libre pod ang pag-photo copies sa tanang gikinahanglang dokumento.


 

More Davnor Updates at

DavNor Karon

 

DavNor News