HALOS tulo ka libo ka tawo ang nakadawat sa sobra otsenta klase-klase libreng serbisyo bisan kung duha lang ka adlaw ang Festival of Services nga didto gipahigayon sa Apokon Elementary School, Enero 21 ug 22.

Sukad pa niadtong Pebrero 2018, ang Festival of Services hatod sa administrasyon ni Gobernador Anthony del Rosario nakalibot na sa tanang munisipyo ug syudad sa tibuok Davao del Norte nga nakaserbisyo na sa halos 110,000 ka Dabaonons.

Sa unang higayon apil sa gidawat libreng serbisyo mao ang manicure, pedicure ug ilabina ang masahe nga gikalipay sa daghan.

Ang senior citizen nga si Alberto nakadayeg sa nagmasahe nga kung pwede unta matulog na lang siya.

“Lahi pod, lahi iyang tirada ba kay bation gyod nimo ang asa gyod dapit ang deperensya nimo kay makapa-piyong-piyong man sa mata. . Lahi pod ang tirada. . ok kaayo aprub. ramdam na ramdam,” matod ni Alberto nga nag-ngisi.

Tungod sa libre, makapa-relax nga serbisyo mapasalamaton ug gitawag ni Alberto nga “once in a blue moon” ang iyang kasinatian.

“Magpasalamat kaayo ta’g dako nga at least once in a blue moon ra ni sa akong kinabuhi nga makatagamtam ug ing-ani ba. Mao nang salamat, salamat kaayo,” matod niya.

Ang laing senior citizen nga si Ramon Balasa gusto nga sige-sigehon ang libreng masahe.

“Gihilot-hilotan na ko. Ay, kalami ana, maski pa ug magsige sila ug ing-ini. Daghan salamat. . pagkanindot ato,” matod sa edarang si Ramon.  

Bisan ang batan-ong mga Mama gustong magpa-relax pinaagi sa masahe.

“Gusto lang para relax pod. Ok sya, nindot kaayo… Makatabang ug maka-relax sa lawas. Nindot kaayo ilang programa,” matod ni Leamor, 44 anyos nga taga Purok 5, Apokon.

“Lami sa paminaw, ma-relax imong lawas. Karon lang jud kay libre man. . Pasalamat mi kay niay ing-ani libre nga massage, libre nga pa-check-up, daghang salamat,” matod sab sa 31 anyos nga si Rochelle Jorolan sa Acosta compound, Apokon.

Sobra usa ka gatos ang nakalista nga magpamasahe apan gibati ni masahista Jun nga taga Garciaville nga lakip siya sa naghatag ug serbisyo publiko bisan kung “honorarium” lang ang ilang dawaton. 

“Ok kay tabang man pod ta sa atong mga kaigsoonan, serbisyo publiko. . Dako ko’g pasalamat ani kay nakatabang ko ani nga programa,” matod ni Jun, ang bugtong lalaki sa grupo sa mga masahista.

Matod ni Ms. Maritess Racacho sa DavNor Employment Workforce Development Division nga bisan kung mobati ug kapoy tungod sa daghan kaayo nga mga kliyente apan matagbawon. Iya sab gipasabot kun nganong karon lang ang libreng masahe, manicure ug pedicure.

“Mas maayo gani ug ang FoS sige-sigehon na ni. Kapoy siya pero at the end of the day fulfilling kaayo. . Pag-abot man gud tong gitawag natong mini FoS nga tagduha lang ka adlaw morag naapikihan mi,  moingon mi’g training man gud maghatag mi adtong pedicure, manicure unya mora’g short period of time man gud so nakahunahuna mi nga kaning mini FoS anion na lang nato kay aron maiba pod ta sa atong serbisyo,” matod ni Ms. Racacho.

Sa gipangutana kung apil ba ang mga taga Kapitolyo, matod ni Ms. Racacho nga last priority ang mga empleyado.

“Apil pod pero last priority na ta. Mao na’y giingon nga kung naay unâ didto na ta sa unâ,” hinapos ni Ms. Maritess dala ang pasiaw.

DavNor News