NGA dunay napulog walo ka libo (18,000) ka mga residente sa sobra 70 ka purok, gidala pagbalik sa probinsyal nga panggamhanan ni Gobernador Anthony del Rosario (AGR) sa barangay Visayan Village ang halos 80 ka serbisyo alang sa wala pa nakatilaw sa Festival of Services (FoS).

“Malipayon kaayo mi kay gidala na pod ug balik ang BEST PEOPLE Caravan of Services nga gipahigayon sa atoang governor, our very own Anthony del Rosario. . Garbo kaayo kay na-providan kaduha, naghatag ug klase-klaseng serbisyo nga among natagamtam dire,” malipayong pahayag ni Konsehal Kelly Coquilla, acting Barangay Captain sa Visayan Village, ang pinakadakong barangay sa Tagum. 

Giawhag sa acting barangay captain ang iyang mga ka-barangay nga dili gyod kalimtan ang pagpasalamat.

“Nalipay gyod mi pag-usab kay kining gipangdala dire nga health services dili na mismo ang mga barangay constituents moadto pa sa mga nagkadaiyang health centers ug mga hospitals. Mismo na ang serbisyo ni Governor del Rosario gidala dire. . .Sa akong mga kabarangay, magpasalamat kita pag-usab sa serbisyo nga nadawat nato nga gipahigayon headed by Governor Anthony del Rosario, ug pinalangga gyod ta niya kay kaduha ta niya gihatagan ani nga mga serbisyo,” awhag-pasalamat ni acting kapitan.  

Kahinumduman nga niadtong Disyembre 3-7, 2018, napahigayon ang FoS didto sa Tagum National High School diin 4,415 lang ang naserbisyohan, dakong hinungdan nga gidala pagbalik ang mga serbisyo nga adunay “pakapin.”

“Balik na pod ang provincial government aron dalhon ang Festival of Services dinhi sa barangay Visayan Village. Karon nga adlaw pod magsugod ang pag-distribute sa bugas alang sa tanang lumupyo dinhi. Ang uban maghulat lang didto sa inyong mga purok kay didto i-distribute ang mga bugas,” matod ni Gobernador AGR nga gikalipay sa mga tawo sanglit ang FoS adunay “pakapin-bugas.”  

Apan buot sa gobernador nga dili lang ang karon nga kalamboan sa Davao del Norte ug Mindanao ang matagamtam.

“Unsa’y obserbasyon nato sukad sa paglingkod sa 2016? Kining Mindanao, para sa kasayoran sa tanan, mao ning isla ang pinakagamay nga budget madawat gikan sa nasyonal. Kay ang kasagaran pondo moadto gyod na sa Luzon, Visayas; gamay ra ang sa Mindanao. . Pero sukad sa paglingkod ni Digong isip Presidente hinay-hinay na nga midako ang pondo sa Mindanao. . Pero ang problema one-term lang ang presidente. So unsa’y buhaton nato? Mangita na pod ta ug laing mopuli kang Digong Duterte nga nia ra pod dinhi sa Mindanao para padayon lang gihapon modako ang share nato gikan sa national government. Mao na’y importante,” esplikar ni AGR sa problema sabay pagpresentar sa kasulbaran.

“Gani kaming mga governors dinhi sa Davao Region uban pod ubang mga governors sa tibuok Mindanao. . ang among gina-tan-aw mao ning among chairman sa Hugpong ng Pagbabago nga si Inday Sara Duterte, ang mopuli sa iyahang amahan pagka-presidente; kay wa ma’y laing kusog nga pwedeng modaug isip presidente. Mao na nga kami tanan naghugpong para mosuportar kang Sara Duterte para sa dako nga pondo sa atong probinsya ug sa tibuok isla sa Mindanao,” padayong pasabot sa gobernador.

Sukad ang Pilipinas nahimong independente mga 121 ka tuig kanhi, kadaghanan sa nahimong mga presidente maoy gikan sa Luzon, duha sa Visayas ug isa lang gyod ang gikan sa Mindanao.

“Sulod sa 121 years tulo pa lang ka tuig nga ang nagdala sa gobyerno gikan sa Mindanao. . . Kung tan-awon nimo mao na’y rason kun nganong gwapo ang Luzon kumparar sa Mindanao ug sa Visayas tungod kay kasagaran ang presidente taga didto. Kung ang presidente taga Mindanao asa man ang pondo? Karong 2022 dapat tinuod gyod ta kang Sara para modaku ang pondo moabot sa Mindanao. . Mao na importante nga imbes six years lang ang presidente gikan sa Mindanao atong i-extend para dako gyod ang pondo pagkahuman sa six years,” esplikar ni Gob AGR.

Atubangan sa taga Visayan Village, dugang gipasabot sa gobernador nga si HnP chairman Sara Duterte nagpili ug mga kandidato nga iyang gisaligan aron maseguro gyod ang suporta para kaniya sa 2022. Ug ang mga kandidato sa HnP kinahanglan pa usab nga magpapili karong Mayo 2019 rason nga matod ni Gob AGR angay gyod suportahan ang mga gipili ni Sara Duterte.

Hangtod ni pagsulat miabot na ug 1,546 ka tawo ang naserbisyohan ug nagapadayon, kagahapon, Huwbes, Enero 24.

DavNor News