BISAN sa kakapoy tungod sa personal nga pagdumala sa panghatag ug relief goods sa mga biktima sa baha, apan aron maserbisyohan ang ubang nanginahanglan, milibot na sab ang Festival of Services (FoS) Caravan nga gipangunahan ni Gobernador Anthony del Rosario didto sa Madaum, Tagum City, Davao del Norte, Lunes, Enero 28, 2019.

“Gipadala namo dinhi sa atong elementary school ang tanang serbisyo sa probinsya sa Davao del Norte mao na ang rason nga ania pod dinhi ang atong mga department heads nga gipangunahan pod sa atong provincial administrator, Mr. Sammy Sanchez. Gahapon, nagsuroy ko dinhi sa Tagum nga nabahaan barangay San Miguel, barangay Pagsabangan, perteng taasa sa tubig sa Pagsabangan gabii; nagsuroy pod ko sa New Corella, Asuncion para mohatag ug mga relief goods kay daghan kaayong pamilya naapektahan sa kusog nga ulan. Gabii almost 40,000 ang nag-evacuate kay grabe kaayo ang tubig,” pagtug-an ni Gob Anthony del Rosario sa kahimtang sa mga apektado.  

Tungod sa libreng serbisyo sa FoS, bisan mga batan-on gipakita nila ang pagka-responsable nga tag-iya ug binuhing hayop.

Unang higayon nga nag-alaga ug iring ang estudyanteng si Habib ug gipahimuslan ang walay-klase nga Lunes aron dalhon ang iyang binuhi nga “meyaww.”

“Gipa-injection ug anti-rabies. . para kuan sa sakit, ligtas. . Governor AGR . . salamat sa kuan sa mga serbisyo nga gihatag,” matod ni Habib.

Si Crizzel, unang higayon sab nagbuhi ug iro ug gipa-injection ug anti-rabies aron malikayan ang sakit.

“Anti-rabies para ma-prevent po yung ano. . Anthony del Rosario po. . Thank you po sa free nga injection sa mga pet,” matod sab ni Crizzel.

Gawas sa naandan nga serbisyo para sa tawo ug mananap, nadungog sa 84-anyos nga si Maura Alahas ang libreng manicure nga gipadala ni Gob AGR nga iyang gikalipay sanglit naanad ug regular siya nagpalimpyo sa kuko sa kamot ug tiil.  

“Nakadungog ko nga si del Rosario. . tuod? . .Maski tigulang na tan-awon ang kamot, gwapo gihapon maskin naa pa’y ugat-ugat. . Salamat sa nagdala nianing programa, ug libre pa gyod. Naa ba’y libreng paniudto? Ug naa ma’y libre nga check-up hinaut unta maapil ko kay sa akong pangedaron naa na man ko’y gibati-bati. Iyawat na lang makuhakuhaan,” pangutana ni Mrs. Maura nga nalipay pagkasayod nga libre sab ang paniudto.

Gawas sa taga Madaum, naka-benepisyo sab si Gemmalyn nga manikurista sa “honorarium” nga nadawat bisan pa man nga dili gyod kalikayan duna’y baho ug tiil nga magpa-pedicure.

“Naa jud na, pero mao man na ang gipili nga trabaho, so dawat-dawat jud. Adjust na lang ka kay di man ka pwede mo-ana sa imong client nga ‘bahoa nimo’g kuan oy’,” pagtug-an ni Gemmalyn nga gikatawa sa kadaghanan apan mapasalamaton kaayo sa mga adlaw nga dunay siya’y kita tungdo sa FoS.

“Daghan kaayong salamat sa programa ni AGR, so kami nga manicurista naa pod mi madawat,” matod ni Gemmalyn.

Sa miaging semana lang, ang FoS gikan na milibot sa Apokon ug Visayan Village ug human sa Madaum, moadto na sab kini sa Gupitan, Kapalong.

DavNor News