DUMALAYON NGA KAAYOHAN ang gihatod sa Festival of Services (FoS) caravan ni Gobernador Anthony del Rosario alang sa mga misis nga sakop sa Lumad nga komunidad bisan kung kabahin na sa ilang kultura ang pagbaton ug daghang anak.

Pinaagi sa mga personahe sa DavNor Provincial Health Office, ilang nasabtan ang kahinungdanon sa pagplano labot sa kal-ang sa pagpanganak (birth spacing) ug sa gidak-on sa pamilya atol sa FoS didto sa Sitio Patel, Gupitan, Kapalong, Davao del Norte.

Si Asnia nga taga Sitio Tawhatok, Gupitan nagpabutang gyod ug Implanon aron makapahulay ang matris ug dunay kal-ang ang panganak.

“Para dili ma-kuan ang akong eggs, dili mahimo nga bata. . Kelangan daw papahuwayon akoang matris,” matod ni Asnia nga gusto hinuon ug lima ka anak samatang mapasalamaton sa mga nadawat.

“Libre. . seedling cacao, durian. Nagpasalamat mi sa among gobernador si del Rosario kay daghang serbisyo gihatag niya, libre walay bayad.”

Ang 22-anyos nga si Amay Magkinompas Piyaw nga taga sitio Sentro, Gupitan realistiko ug nagpabutang sab ug Implanon para dili una masundan ang anak.

“Kay para di pa masundan ang isa. Duha or tulo kay nagsabot na mi sa akong pares nga dapat mag-kontrol lang ta’g anak. . kay basin di na makaya sa panginabuhi,” pahayag ni Mrs. Piyaw nga mapasalamaton.

“Si Governor Anthony del Rosario dako jud akong pasalamat sa iyaha kay siya ang naghatag sa maayohon; ingon niya nga mahimo na ang Gupitan, mahimo nang lungsod. Daghang salamat,” matod ni Mrs. Piyaw.

Bisan ang mister nga si Tony Ig-igpat mao gyod ang nag-awhag sa iyang misis nga magpabutang ug Implanon sanglit duna na sila’y unom ka buok anak.

“Unom na lang nabilin sa among anak kay namatay ang isa. Dili na, kay lisod ang panginabuhi nato,” pahayag sa 53-anyos nga mister.

Gawas sa Implanon, ang batan-ong mga misis nga Lumad kugihan nga nagpa-prenatal.

“Magpa-prenatal, magpa-prenatal para sa nutrisyon sa bata. . Tulo lang, dili na. . . Salamat sa tanan,” mubong tubag ni Mrs. Jovy P. Tindugan, 19-anyos gikan sa Purok Paongatok, Gupitan nga misaad ipadapat ang gitudlo sa mga health personnel.

Si Mrs. An-an Masaloon andam sab mag-family planning ug gusto nga isa lang ka buok anak samtang mapasalamaton sa mga serbisyo.

“First time, mao na. Isa lang. Nagkasabot na mi. . . . Si del Rosario, salamat sa tanan nga gihatag nila sa amoa,” mubong tubag sa 19-anyos nga misis.

Kay panguma lang ang panginabuhian, gusto sab ni Mrs. Mary Joy nga duha lang gyod ang ilang anak.

“Duha ra kay lisod. . Uma lang. Daghang salamat sa inyong gidala nga serbisyo,” matod ni Mary Joy nga taga sitio Langan, Gupitan.

Sa matag libot sa Festival of Services kanunay gipahinumdum ni Gobernador Anthony del Rosario ang responsableng pagka-ginikanan (responsible parenthood) nga paningkamotan gyod makahuman ug eskwela hangtod sa kolehiyo ang mga bata sanglit libre na kini ilawom sa administrasyon ni Presidente Rodrigo Duterte.

DavNor News