WALA na’y undang ang hatod-serbisyo sa probinsyal nga panggamhanan sa Davao del Norte pinaagi sa Festival of Services (FoS) caravan.

Kini ang gibutyag ni Probinsyal Administrador Samson Sanchez atol sa Kapihan sa Kapitolyo, Huwebes, Pebrero 7. 

“Nag-kick-off ta sa Pebrero 2018. Tuloy-tuloy na hangtod karon, it becomes a regular program sa Davao del Norte kay kita nato ang ka-importansya, epekto, ang impact sa tanang katawhan nga maagian sa Festival of Services gikan sa Talaingod down to Talicud Island sa Samal. Karon naa ta sa second wave, balik na pod ta sa atong mga barangay sa Distrito I diin gidala ang mga kapin kun kulang mga one hundred services sa probinsya ngadto sa katawhan,” pahayag ni probinsyal administrador Sanchez.

Kini nagpasabot nga bisan kung magsugod na ang election campaign period sa lokal, ang FoS magpadayon.

“Angay masayod nila nga wala pa’y eleksyon programa ni sa atong gobernador diha sa “Abilidad at Malasakit” branding. Sama sa akong giingon kaganina, dili epektibo ang paghatod sa mga programa, mga proyekto ug mga kalihokan diha sa BEST PEOPLE development strategy kung wala ka’y behikulo nga lig-on. Gipalig-on sa ni gob ang iyang organisasyon diha sa probinsya, mao na ang Kapitolyo. Tagaan sa nimo ug sakto nga manpower, skills aron epektibo ni sila mopadagan sa BEST PEOPLE development strategy, didto na siya sa Malasakit side. Dili ni pamolitika tungod kay nagsugod ni sa miaging tuig pa,” pasabot ni Sanchez.

Sa gipangutana labot sa kaepektibo ug pagka-mapinadayonon (sustainability) sa FoS:

“Bisan kinsa sunod nga administrasyon ni Governor AGR, tungod kay nabutang na ni siya as one of the activities sa BEST PEOPLE program, ma-sustain na ni siya. Ang mga tangible, mga impact nga nasinati sama sa mga tawong nakakuha ug mga PhilHealth unya naospital, na-avail na nila ang mga serbisyo. Kaning mga immediate medical attention, mga minor surgeries, agriculture, environment programs, livelihood magbuhat ug cake ug daghan pa. Pero ang usa gyod nga impact, ang benefits sa Kasalan sa wala makasal,” pagpasiugda ni administrador Sanchez ilabina dihang ma-legitimate na ang mga asawa ug kabataan diin pwede na sila mahimong benepisyaryo sa ilang ginikanan ug ilabina sa mga programa gikan sa gobyerno sama sa Philhealth ug ubang ahensya.

Gikan sa pagsugod sa FoS niadtong Pebrero 2018, sobra 100,000 na ka lalaki, babaye, bata, tigulang ang nahatagan serbisyo way labot sa mga binuhing kahayopan ug kini nagkadaghan pa samtang ginapadayon paghatod ngadto sa mga LGUs Davao del Norte.

Tungod sa daghang benepisyo para sa publiko, nanawagan si administrador Sanchez nga unta dili pugngan ang katawhan pag-adto sanglit ang mga serbisyo sa FoS walay gipili bisan unsa ang imong kolor sa politika o partido.

DavNor News