DAMGO NGA NATUMAN ang pagbaton ug television sets alang sa matag classroom sa Nueva Fuerza Elementary School (NFES), usa ka hilit nga eskuylahan sa Tagum City.

Human mahibaloan ang tumong sa DepEd nga magbaton gayod ug tv alang sa epektibong pagtudlo, mihimo ug pag-surbi si Gobernador Anthony del Rosario (AGR) sa tibuok Distrito Uno sa Davao del Norte ug giisip nga misyon ang pag-apod-apod sa tulo ka libo wala pa’y television nga mga classrooms. Iyang gitumong nga sa bulan sa Marso makompleto na paghatod ang 3,000 ka tv.

“Ang pagtuo sa DepEd kung naay tv mas dali silang makatuon, gwapo nga programa. Ang pangutana naa ba’y pondo ang DepEd? Tubag nila wala kay ang pondo sa DepEd para lang sa classroom kay kulang ug classroom sa atong nasod. . Si Congressman del Rosario na lang ang mopalit sa mga tv para ang mga ginikanan dili na mag-amot-amot. Kanang kwarta nga iamot sa pagpalit sa tv gamiton na lang ninyo na para sa inyong panginahanglan,” matod ni Gob AGR nga gikalipay pag-ayo sa mga magtutudlo, mga ginikanan ug mga estudyante.

Sanglit walo lang ang nauna nga gihangyo ni NFES Principal Marichu Rebosura Suarez, walo lang sab ang gidala ni Gob AGR atol sa pagbukas sa Festival of Services, Byernes, Pebrero 8. Apan dugang mihangyo ang principal ug dugang unom pa sanglit karaan na nga model ang ilang 6 ka tv nga gipasalig ni AGR nga mosunod ra sab ang paghatod.    

“Mao gyod na ang among dream sa una pa, wala pa nagkuan si gov nagsige na gyod mi’g pangandoy. Gikan baya ko’g Pilot school. .  gwapo sila kay dili na magsulat-sulat sa manila paper, sa kartolina kay pindot-pindot na lang. . Mangarap lang gud ta, malay mo naay moabot. . Karon ra gyod nga time, hala oy, gitubag na gyod ang atong pangandoy. Makaingon man gud mi nga maski naa sa bukid, di pod makaingon nga taga syudad ra diay ang maggamit ug LED tv,” pagbutyag ni NFES principal Suarez sa kanunay nilang gihandom uban sa mga teachers.

“Kung naa gani visual aids ang mga bata mora’g magsiga-siga ilang mata, how much more kung tv, ma-excite sila. Na-observe gyud nako. . lahi gyod ang feeling sa bata kung naay tv. . . Gikan baya ko’g Pilot, hala luoy diay pod ning sa barrio school, morag ma-demoralize pod ang mga teachers ba, morag kinaraan mag-chalk-chalk, ang uban sa syudad ana-ana na lang sa projector. . Mao na gyod ni nga time natubag na gyod ang pangandoy sa Nueva Fuerza,” malipayong dugang pahayag ni Suarez.

Ug gipaneguro ni Principal Suarez nga duna gyod maayong resulta tungod sa mga tv.

“Giingnan nako ang mga teachers, ang ROI ana ba, proficiency sa mga bata. Ang ROI lang gyod ang akong gipangayo, ang proficiency sa mga bata nga naay effect kay lain pod kaayo ningdawat ta kay gov unya ang effect mao ra man diay gihapon. Dapat gyod naay ROI kay lain pod nga wala man lang ta’y ibalik. . Mao gyod na’y gina-emphasize nako sa mga teachers nga naay effect. Ipadayon nako ang classroom observation unsay effect sa naay tv ug sa wala,” dugang sa principal nga nagdahom nga wala na unya’y non-reader ug mogamay na lang ang mga absences.        

Gipasalamatan pag-ayo ni Day Care teacher May Jean Tomon ug andam nga gidawat ang hagit nga “ROI.”     

“Governor thank you so much sa imohang gihatag nga tv, magamit jud kaayo ni sa mga bata ug makapasalig ko 100% nga ang mga bata mas mahimong aktibo sa ilang pag-eskwela ug dili na gyod sila ganahan mo-absent pa kay naay uban dire nga wala’y tv sa balay ganahan na jud sila mo-eskwela kay naa na’y tv sa room. Daghan kaayong salamat governor del Rosario sa imong kaayo,” matod ni Ms. May Jean Tomon.   

Ang Grade VI teacher, Mary Joy Rafoncill Sanmillan mapasalamaton kaayo kang Gob AGR kay bisan siya naghunahuna na sa una nga mo-donate ug tv para sa iyang klase.

“Sa atoang gov, daghan, daghan kaayong salamat sa imohang paghatag aning tv sa amoa karon. Dako kaayo ni siya’g tabang sa amoa labina nga dugay na jud ko nagahandom nga naa jud ko’y tv sa akoang classroom. Kung pwede lang, kung daghan pa ko’g kwarta mo-donate jud ko mas dako pa jud nga tv akong mahatag pero unsaon ta man sa kalisod dire, kita na man gyod ninyo ang community nga ang mga tawo dinhi maglugos jud sila sa ing-ana nga kantidad. Salamat gyod kaayo ug dako kay gov sa iyahang initiative nga matagaan jud mi,” matod sa mapasalamaton nga si Ms. Sanmillan

Sanglit ang paghatod sa mga tv maoy atol sab sa pagdala sa Festival of Services (FoS), gipaneguro pag-ayo ni Principal Marichu Suarez nga wala’y malaktawan nga klase agi sab ug pagtamod sa Memorandum gikan sa Tagum SDS Dr. Nelson Lopez.

DavNor News