DILI lang pagtambal ang dala sa Festival of Services caravan ni Gobernador Anthony del Rosario kundili apil na niini ang pagtudlo ug panagana pananglit dunay katalagman.

Ang panultihon “ang panagang mas maayo kay sa pagtambal” (Prevention is better than cure) gihimo sa DavNor Provincial Disaster Risk Reduction Management Council (PDRRMC) nga gitudloan ang mga residente sa lima ka barangays sa Timberland District—Sta Fe, Mambing, El Salvador, Patrocenio ug Del Monte sulod sa lima ka adlaw nga FoS, Pebrero 11-15.

“Atoang gi-assume nga dunay linog karong adlawa. At least naa ta’y nahibal-an, so kadto atong buhaton: duck, cover and hold. Simbako, simbako kay duna po’y fault line ang Purok 3, posible maapektohan gyod ta, palayo lang. Kining atong gibuhat pangandam ni kung engkaso dunay linog malikayan nga dunay disgrasya,” matod ni Kapitan Gerry sa barangay Mambing.

Human sa quake drill nga giapilan sa gatosan ka mga residente lakip na ang mga bata, tigulang, maestra ug mga estudyante, gi-“gradohan” kini sa evaluator.

“Very good gyod kaayo kay nag-participate ang tanan. Naa la’y kinahanglan i-improved. . Una, pag naa ka naglingkod diha sa taas, ayaw diha pag duck, cover and hold kay seguradong maligid gyod ka. . dili to pwede. Ikaduha, naay naglingkod ilalom sa suga. Pwede na matagak sa inyoha. Kung naa mo sa inyong balay, adto mo sa poste. Kung semento, adto mo sa lig-on nga lamesa unya gunitan na siya kay mobiya na nimo panahon sa linog. Pag naa gani mo madungog bagnos sa bato, bantayi kay basin mag-landslide ang yuta. Kung ang inyong balay duol na sa pangpang, kung mahimo i-isbog-isbog,” matod ni Quake Drill evaluator FO3 Robert Carlo Rafosala.

Dugang gipasabot ni Rafosala nga dili na maghulat nga pugson pagpabakwit ug mahibalo sa angay’ng buhaton. Giawhag sab ang napulo ka boluntaryong lalaki ug babaye gikan sa barangay aron magbansay sa DavNor PDRRMC.

“Ayaw paabota nga i-forced evacuate mo. Unang-una taas ug chance nga dili mi kaabot dire sa inyohang lugar. Walay tabang maabot dire in a few hours. Why? Kay pwede mo ma-isolate. Ang dalan giagian namo pwede diay to mahugmak, kamo-kamo lang dire. Mao nang importante kaayo nga motabang mo sa amoa. Kung naay drill maningkamot nga mag-participate. Ikaduha, gina-awhag namo nga moapil ug training sa disaster kadto lang tinuod nga lalaki ug tinuod nga babaye kay puhon lagi mao ra nang mga tawhana ang mo-rescue sa inyoha. Kay kung naglinog sa inyoha, naglinog sab ang laing lugar. So ang tumong sa atong probinsya is kaya ninyo mo-responde, mobutang sa safety nga lugar nga kamo-kamo sa,” padayong pasabot ni Rafosala.

Gitambongan pa ni New Corella Mayor Rhodora Alcoran ang pag-praktis.

“Dili nato komedyahan, hinuon atong seryosohon ang ilang gitudlo. Ngano man? Panahon sa tinuod nga kalamidad simbako lang, kita-kita ra dinhi ang magtabang-tabang sa barangay kay otro pod na sila sa ilang lugar gilinog pod didto. . Nagpasalamat ko sa provincial disaster risk reduction management and of course ang atong municipal risk reduction management kay isa gyod nga ilang gi-identify karon ang atoang pag-praktis, . . Kinahanglan pod ang atong BDRRM nga mokat-on ug susama niini kay simbako ug mahitabo ni,” pasabot ni Mayor Alcoran.

Giapil gyod ang Earthquake Drill  sa paghatod sa Festival of Services caravan sanglit nahibaloan nga adunay fault line sa Purok 3 sa barangay Mambing gawas pa pupanahon nga landslides sa mga bukirong barangays sa Timberland district.

DavNor News