DUHA KA GATOS NAPULO’G UNOM nagpuyo-puyo nga mga magtiayon ang nahimong legal ang kaminyoon pinaagi sa Festival of Services caravan Kasalan ng Bayan hatod ni Gobernador Anthony del Rosario (AGR), Huwebes, Pebrero 14, 2019.

Kawhaa’g duha (22) ka paresan ang gikasal sa Tagum City, kalim-an (50) ka magtiayon ang nagpakasal sa Asuncion, kasiyaman ug siyam (99) sa Kapalong ug kap-ata’g lima (45) ka paresan sab ang gikasal didto sa Santa Fe, New Corella diin gilibre tanan ang ilang bayronon, sinina, cake, wine ug bisan regalo.  

“Ganihang buntag dunay earthquake drill dire kay ingon ang Philvocs daghan man nagminyo karon nga adlaw, molindol jud unyang gabii,” pasiaw ni Gob sa mga kaslonon didto sa Sta Fe.

Apan nahimong seryoso ang gobernador tungod sa mga kaayohan luyo sa legal nga panagtipon.

“Dugay na mo nagtipon pero kami sa province gusto man gyod namo nga ang tanan nagtipon gusto namo nga legal. . .kay importante na sa gobyerno. Daghan baya mga benepisyo gikan sa gobyerno. Unya kung di mo legal nga mag-asawa maglisod usahay magkuha ug mga benepisyo ilabina sa inyong mga anak. So pinaagi sa atong programa dinhi sa provincial capitol nga libreng kasal, tanan libre bisan pagkaon ninyo unya, mga regalo libre gyod ni tanan. . . Memorable karon nga adlaw. Ako’y nanghinaut nga kamong tanan mahimong malampuson sa inyohang mga kaminyoon ug ang inyohang kinabuhi isip husband and wife,” pasabot sa gobernador uban ang pasalamat sa tanang department heads, mga empleyado ug bisan ang mga opisyales sa lungsod ug barangays.

Mapasalamaton kaayo ang magtiayon Bienvenido Dayaganon, 71 anyos ug Trinidad Panduro, 61 anyos nga taga Del Monte, New Corella nga pito na ka tuig nag-ipon g nagpakasal wala’y sapayan sa ilang pangedaron.  

“Nagpasalamat ko sa iyahang caravan nga Kasalan nalibre pod mi ani. Daghang salamat niya. Wala gyod mi kaandam, mosibog gani unta ko kay naapikhan mi. Moingon unta ko nga di lang sa mi moapil,” matod ni Bienvenido.

Wala sab kapugong nga magpasalamat ang asawa nga si Trinidad.

“Syempre, nagkinahanglan jud mi’g kamatuoran nga kami mag-asawa na gyod. Syempre gihigugma pod nako siya bisag mga tiguwang na mi. . nagkasinabot gyod mi . .maraming salamat, salamat sa iyahang paglibre sa amoa. . magpasalamat gyod mi kaayo’g dako sa iyang tabang namo,” matod sab ni Trinidad.        

Si Mrs. Charlie Dongke nagpasalamat sab uban sa iyang bana nga si Jojo nga dunay unom ka anak.

“Nakahunahuna mi’g pakasal gumikan sa kaugmaon sa among mga anak, panahon nga naay kinahanglanon sa eskuylahan naa dayon mi ikatubag, aron matul-id ang dagan sa ilang pag-eskuyla. Salamat nga gimugna niya ning Kasalan ng Bayan kay daghan ang naaghat ini pagpakasal kay daghan ang nag-ipon nga matured na,” matod ni Mrs. Charlie.

Bisan si New Corella Mayor Rhodora Alcoran mapasalamaton sa Festival of Services labi na gyod sa Kasalan.

“Nalipay kaayo ta nga daghan tang na-cater sa libreng kasalan. Labaw sa tanan ang atong pasalamat kang Governor Anthony del Rosario nga iyaha ning gi-grant nga hangyo sa lungsod sa New Corella. Kana tungod sa dako nga kasingkasing sa provincial government headed by Governor Anthony del Rosario ug sa makugihon nga mga empleyado nga lima ka adlaw nagbalik-balik dinhi sa bukid,” pasalamat sa mayora sa New Corella.

Gikan niadtong Pebrero 2018, miabot na ug 1,448 walay-kasal nga panagtipon ang nahimong legal tungod sa libreng Kasalan ng Bayan dala sa matag libot sa Festival of Services caravan.

DavNor News