KAAYOHAN para sa mga lumulupyo sa barangay ang panguna alang sa San Miguel, Tagum City Barangay Kapitan dihang gi-ablihan ang BEST PEOPLE Festival of Services (FoS) caravan ni Gobernador Anthony del Rosario (AGR) nga mohimo ug duha ka adlaw lain-laing serbisyo ngadto sa mga residente niini, Pebrero 18 ug 19.

“Ato gyong dawaton, kay dili kaya sa barangay nga maghimo ug susama niini. So tanan nga moanhi, mobisita kanato ato gyong i-welcome. . kay kang Governor sa tinuod lang, naa siya’y gihatag nga project sa atoa, kanang SK building. . Kini po’ng atoang gym hingdako, hingdako ni; aduna po’y contribution si governor niini, kadtong extension, iya pod ko’ng gihatagan. Busa nganong dili nato i-welcome nga naa man jud siya’y project,” pasabot ni Barangay Kapitana Vilma Rivera uban sa pag-ila sa mga nadawat nga mga proyekto sa San Miguel gikan sa administrasyon ni Gob AGR.

Gawas sa kaayohan nga madawat, gipamatud-an ni Kapitan Rivera ang respeto nga angayan ihatag ngadto sa kinalabwang posisyon sa probinsya. 

“Susama niining medical mission, dili gyod ni kaya sa barangay kay pila ra ma’y IRA sa barangay. So ang tanan nga maghimo ug mga activities nga moanhi sa barangay, silang tanan akong i-welcome. Atong i-welcome kay naghatag sila nato ug maayo nga panig-ingnan nga kinahanglan aduna ta’y respeto isip siya ang atong governor. Wala ko’y problema ni Governor kay suod gyod mi ana gikan pa sa iyang amahan. Salamat kaayo sa mga lumulupyo sa San Miguel nga sa akong panawagan inyo pod kong gituman,” dugang pasabot sa kapitan uban sa pasalamat sa iyang mga ka-barangay.

“Karong adlawa magsugod, duha ka adlaw ni nga Festival of Services, nga ang tanan mga serbisyo gikan sa probinsya among ginadala sa katilingban para mas dali kamo nga matabangan kung aduna mo’y mga problema. Kung gusto mo magpa-ibot, pwede. Naa ta’y check-up para sa mga buntis, naa ta’y ultrasound machine. Kung naa mo’y mga cyst, kanang mga bukol-bukol nga gusto ninyong ipatanggal, minor surgery na, pwede pod. Kung naa pod mo’y mga iro nga gusto ninyo ipa-vaccine, anti-rabies, naa pod mi ana. Kung gusto mo magtanom ug gulay sa inyohang balay naa pod mi ikahatag nga semilya. So kumpleto na,” paghingalan ni Gobernador del Rosario sa libre nga mga serbisyo nga pwedeng madawat sa matag usa.

Gawas sa libreng serbisyo ug mga tambal, bisan ang pa-lugaw sa buntag ug hapon ilabina ang paniudto libre sab.

“Basta tanan, tanan programa under sa probinsya naa tanan dinhi sulod sa duha ka adlaw. . Bisan paniudto naa pod, naa pod pakaon. Kung wala mo’y interes sa mga serbisyo unya gusto lang mokaon, anhi lang mo dinhi kay mangaon ta, pwede pod, walay problema. Basta kining tanan, libre gyod ni gikan sa provincial capitol sa Davao del Norte,” pag-klaro ni Gob AGR.

Sa unang adlaw pa lang sa Serbisyo Caravan sa San Miguel, halos 1,500 na ang nahatagan ug lain-laing serbisyo sa panglawas, sosyal, legal wa pa’y labot ang mga serbisyo nga gihatag ngadto sa mga binuhing hayop.

DavNor News