GIANI na karon ang maayong resulta gikan sa gihatag nga tabang-sa-pagtudlo nga materyal, ang television sets, nga gipang-apod-apod ni Gobernador Anthony del Rosario (AGR) sa tanang publikong elementarya ug highschool nga mga eskuylahan sa Distrito I sa probinsya.

“Dako gyod kaayo’g tabang labina ang mga lessons, mga exams usahay wala pa’y questionnaire from Division, so magamit nato siya kay i-flash nato to’ng isa lang ka copy nga test paper, pwede na sa tanan, so maka-answer sila sabay-sabay, plus ang attention nila,” matod ni Grade I Titser Morales sa Rosalio Saludares Elementary School sa Magdum, Tagum City.

Kahinumduman nga kadaghanan sa Festival of Services caravan nga dad-on, ang mga eskwelahan ang nahimong venue ug “na-diskobrehan” ni Gob AGR nga kasagaran sa mga classrooms walay tv nga makatabang sa pagtudlo ug pagkat-on nga proseso (Teaching Learning Process). Giuna pa gani paghatag ang layo kaayo, lisod abton nga Sitio Patel sa Gupitan, Kapalong.

“I-turn-over nato ang inyong gipangayo nga tv para sa inyohang eskuylahan para ang tanang classroom naay tv. Kay ang akong tuyo nga ang tanang classroom sa Distrito I adunay tv. Kay kung walay tv maglisod sila makatuon ug maayo. Kung walay ihatag nga tv kamo pa ang mag-amot-amot. Para di na mo mogastos ako na lang ang mohatag ug tv sa inyong eskuylahan,” ang mensahe ni Gobernador AGR sa taga Patel niadtong Enero 31, 2019.  

Ingong pagpatuman sa Republic Act 10533 o “Enhanced Basic Education Act of 2013” alang sa K-12 nga edukasyon, ang Department of Education (DepEd) nagpagawas sa Order No. 35, Series of 2016 nga nag-awhag nga i-aplikar ang Learning Action Cell (LAC) diha sa matag eskwelahan pinaagi sa paggamit ug mga materyales nga makapadali sa pagkat-on.  

“Ang tv man gud naa sila’y matan-aw ba. . sa among lesson dili na mi magsulat sa blackboard, power point then connect sa tv. Kung walay tv, blackboard, manila paper. Karon deretso na. Di na kaayo hasol magsulat. . Dako kaayo ning tabang sa mga bata ug nakatabang sa amoa. Thank you kaayo kay natagaan mi’g tv,” matod ni Grade IV titser Ms Binogsadan sa RSES.  

Ang Grade 2 pupil nga si “Rachel” natabangan sa pagbasa ug pagkat-on sa maayong pamatasan gikan sa tv.  

“Naka-learn sa pagbasa. . sa mga asal. .  thank you sir del Rosario,” matod sa Grade 2 nga estudyante.

Ang iyang titser nga si Mrs. Pal nagpamatuod sa ka-epektibo sukad duna na’y tv ang ilang classroom.

“Nakatabang gyod siya, very useful labi na sa mga bata nga medyo dili kaayo sila advance, maka-learn talaga ang mga bata especially ano na sila mga high-tech na sila, gusto nila ng mga ganyan na ang gamitin. .Maka-lessen sa amoang, labi na sa pag-pabasa, helpful gyod kaayo para sa mga bata ang pagbasa. .Daghan kaayong salamat kang governor nga gitagaan mi niani nga mga tv, nakatabang ug maayo sa among mga bata pati sa among mga kaubanan nga mga teachers, daghan kaayo’g natabangan pod,” matod ni titser Pal.   

Kay kinahanglanon gayod, tumong karon ni Gobernador Anthony del Rosario nga ma-deliver na ang gikinahanglang 3,000 ka mga tv sets sa elementarya, hayskul apil na ang tanang Day Care centers sa Distrito I sa Davao del Norte sa dili pa mahuman ang bulan sa Marso, 2019.

DavNor News