GUMIKAN sa padayong paglibot sa Festival of Services (FoS) caravan, direktang nasayran ni Gobernador  Anthony del Rosario (AGR) ang pangunang problema sa katawhan sa tibuok Davao del Norte nga nahatagan sab dayon ug diha-dihang solusyon.

Ug bisan holiday (Pebrero 25), gihatod ang FoS caravan alang sa mga barangays Bingcungan, Busaon ug ug Liboganon ug nasayran ang dugay nang gi-mulo nga problema nga nagkinahanglan ug diha-dihang solusyon.  

“Kada adlaw daw mo nag-antos kay wala mo’y tubig dinhi. Mao na nga gisugo gyod nato ang atong disaster office: Kada adlaw dunay water tanker dinhi para mohatag ug tubig, kada adlaw. . .Asa man ang taga disaster? Paminawa akong isulti: Hangtod nga wala pa’y solusyon ang patubig dinhi sa Liboganon, gusto ko everyday naay water tank dinhi,” padayag sa diha-dihang solusyon ni Gobernador AGR nga gikalipay sa mga residente.

Apan gikinahanglan gihapon ang dumalayon nga kasulbaran sa problema ilabina sa pangunang kinahanglanon, ang tubig.  

“Pag-abot sa mga duha ka bulan, . wa na ta’y pondo. . pag moingon na sila ana, didto na nato i-pressure ang atong provincial engineering office kauban ni vice mayor Jun Coquilla, kauban ni Congressman Anthony del Rosario ug ni Mayor Boyet Gementiza, amo gyod pabutangan ug tubig dinhi. Saad nako na! Naa na mi solusyon. . . Mahal nga solusyon pero wa man ta’y mabuhat kinahanglan man gyod kay layo man ning Liboganon,” dugang padayag ni Gob AGR nga wa ibutyag sa unsang paagi dad-on ang tubig sa Liboganon kay basin ug “kopyahon.”

Ug siyempre ang pangunang tumong sa FoS mao ang paghatod sa mga serbisyo nga gikahinangop sa mga residente ilabina sa taga Liboganon.

“Magpa-check-up mi dire ug magpa-tupi sa akong anak; pa-manicure, mangayo mi ug vitamins. . Ugma mamalik na sad mi. . Gwapo ni kay napilian ang Liboganon sa Hugpong ng Pagbabago ug daghan pa unta’y moabot nga mga maayohon sa Hugpong ng Pagbabago,” matod ni Mrs. Aileen Rabor, usa ka fish vendor..

Pwerteng pasalamat ni Mrs. Rabor dihang nabati ang pahibalong solusyon ni Gob AGR.

“Tubig jud among kinahanglan dire. . Nagpasalamat mi kang Governor kay gitagaan mi dire ug suporta sa tubig. Dako kaayo among pasalamat nga butangan mi diria ug tanker para di na mi magpait ug tubig, di na mi moadto sa Bingcungan. Pait jud dire ang tubig, tubig ra jud ang among kinahanglan dire,” todo-pasalamat sa tigbaligya’g isda nga nagbutyag nga kinahanglang mobiyahe pa sila ug halos unom (6) ka kilometros aron lang makakuha ug tubig.

Tungod sab sa FoS, direktang nasayran ni Gob AGR sa tibuok Distrito Uno sa probinsya ang problema sa teaching material nga TV nga iya dayong gihatagan ug aksyon pinaagi sa pagpalit ug paghatod sa 3,000 ka tv sets alang sa tanang elementary, hayskul lakip na ang Day Care centers.

DavNor News