SA TINGUHA nga mahatag gyod ang gikinahanglang serbisyo sa katilingban, bisan holiday, padayon nga gihatod ang sobra otsenta ka mga serbisyo sa Festival of Services (FoS) caravan alang sa barangays Liboganon, Busaon ug Bincungan, Lunes, Pebrero 25.

Ang Pebrero 25, 2019 maoy ika-34 nga kasumaran sa malinawon nga Edsa rebolusyon balik niadtong 1986.

“Atong i-acknowledge ang atong mga department heads. Bisan holiday karon ania sila dinhi, gipangunahan sa atoang provincial administrator Sammy Sanchez. . Kining atong Festival of Services duha ka adlaw ni, mao ni ang mga serbisyo gikan sa Provincial Capitol nga among gidala dinhi sa atoang barangay Liboganon para di na mo mobayad ug pamilite para lang mangayo ug serbisyo sa Kapitolyo. . oportunidad ni sa tanang residente sa Liboganon ug sa mga silingang barangay nga makaanhi dinhi sa tanang mga libre nga serbisyo apil na dira ang libreng kaon, paniudto,” matod ni Gobernador Anthony del Rosario ngadto sa mga residente sa tulo ka barangays nga mitambong atol sa pagbukas sa FoS caravan niadtong Lunes, Pebrero 25.

Mapasalamaton gayod kaayo ang mga residente sa gidala daghang serbisyo, mga tambal ug pipila nga nakadawat sa ilang espesipiko gihangyo nga tabang.

“Molakaw mohangos siya. . Ganiha pagkahibalo niya nga naa na, dako iyang pasalamat. . Ako na lang mianhi kay ako man gyod nag-request gud. Luoy man gud ko sa iyaha kay kung molakaw taud-taod lang moundang kay mohangak siya. Mao na ako gyong gipangayo sa asawa ni Congressman Anthony del Rosario,” matod ni Flora Bacunga nga nakadawat sa iyang gihangyo nga wheelchair kang Ms. Aina del Rosario nga gitunol niadtong Lunes.

“Dako, dako gyod kaayo akong pasalamat nga natubag gyod akong gipangayo, hangyo. Dako kaayo akong pasalamat sa iyaha, labi na ni Maam. Siya maoy akong gi-requesan, natubag gyod dayon. Nagpasalamat ko sa ilaha magtiayon nga natubag gyod akong gipangayo. Salamat!,” halos di mounding pasalamat si Mrs. Bacunga.

Si barangay kagawad Criselda Alba mapasalamaton dili lang para sa iyang kaugalingon kundili alang na sa tibuok barangay Liboganon.

“Check-up sa mata, panghatag ug seedlings, maayo na lang naa mi ma-itanom sa among lote. . Lipay kaayo ang katawhan sa Liboganon nga nadala kining serbisyo dire sa among barangay tungod kay daghan kaayo mi’g na-avail tungod sa serbisyo sa kabataan, dagko, sa mga libreng gupit. Basta daghan kaayo. Dako gyod among pasalamat kay daghan na-avail among mga katawhan dire sa Barangay Liboganon,” matod ni Kagawad Criselda.

Sanglit residente diin gipahinabo ang FoS, dali nga na-gupitan si Mr. Juan Aguilar sa Purok 5, Liboganon.  

“Maayo gyod kay nakatabang pod sa atoa. . Ang ginagmay ta nga kawad-on malibre. Daghan salamat sa tanan nga nag-kooperasyon niining panahona, si del Rosario. Salamat gyod niya. Karon pa gud na siya pod, pero maayo sad,” pag-obserbar ni Mr. Aguilar samtang gi-gupitan.

Ang Grade 12 nga si Aila Maga nga taga Purok 3 Liboganon usa sa mga “naka-una” sa mga serbisyo.

“Nangayo mi’g tanom then nagpa kuan na lang pod mi sa free manicure ug free pedicure. . Two days man ni, niadto nalang pod ko diria para magpa-gupit, nindot kaayo,” pakita ni Ms. Aila sa iyang bag-ong gupit nga buhok ubang ang pagdayeg ug pasalamat sa mga serbisyo nga nadawat.

“Nindot kaayo, nindot siya. Then two days daghan pod nakabenepisyo ani nga programaha. Sa tanan nag-ano sa HnP, daghan kaayong salamat, daghan pod sila’g natabangan. Daghan salamat kay AGR labina sa iyahang tanan partido kay gihatod jud diria bisan layo,” dugang pasalamat ni Aila.

Kini na ang ika-27 nga paglibot sa Festival of Services caravan alang sa mga barangays Liboganon, Busaon ug Bingcungan.

DavNor News