KAY NAHIMUTANG sa kanunay bisitahon sa tubig-baha nga lugar, giagian sa mga ‘fault lines,’ pagdahili sa yuta, bagyo ug bisan katalagman nga hinimoan sa tawo, gipailawom sa usa ka adlaw ‘Reduce the Risk: Ensuring the Safety of our Communities’ ang mga barangay opisyales sa tibuok probinsya sa Davao del Norte.
Kay mao ang tinubdan sa tubig-baha nga Liboganon ug Saug Rivers, unang gipailawom ang mga barangay opisyales sa Talaingod ug New Corella lakip na ang San Isidro, Asuncion ug Tagum City, Lunes, Marso 4, 2019.
“Kining atong activity karon, maoy para sa pangandam sa mga disasters. Mao na nga naghimo ta ug ing-ani nga programa. . Mao na nga ang probinsya sa Davao del Norte kanunay naghimo ug lainlain nga pamaagi susama ani nga programa, sa paghimo ug mga earthquake drills ug pagpatukod sa mga early warning systems kay gusto nato nga kung dunay moabot nga disaster importante nga kitang tanan andam. . nakahibalo unsa ang atong buhaton. Although dili nato gusto naay disaster moabot dinhi pero importante andam ta pirme,” matod ni Gobernador Anthony del Rosario nga dugang nag-esplikar sa angayan buhaton sa matag tingog sa siren.
“Naay natural, human-induced ug technological hazard. .Kitang tanan naay responsibility ani nga mga hazard maliban sa natural hazard,” pasabot ni Ms. Nova Jean Rojas sa DavNor Provincial Disaster Risk Reduction Management Office (PDRRMO).
Base sa datos nga nahipos sa PDRRMO, ang probinsya sa Davao del Norte giagian sa tulo (3) ka mga fault lines (dagkong liki sa yuta) nga mahimong peligroso panahon sa kusog nga linog. Ang Davao River Fault Line diin giagian niini ang barangay Sto. Niño sa Talaingod; Central Mindanao Fault nga mitadlas sa Gupitan, Florida, Suaon, Mabantao sa Kapalong ingon man Dacudao ug Libuton sa lungsod sa San Isidro; ug, ang Eastern Mindanao Fault diin mitadlas usab kini sa Barangay Buan ug Camansa sa lungsod sa Asuncion ug mga barangays Mambing, Patrocenio, El Salvador ug Del Monte sa lungsod sa New Corella.
“Apektado gyod ang probinsya nato kay naay tulo ka fault lines. Kung adunay mga 7 magnitude or even 8 morag dako gyod ang impact sa atoa. Ganiha nag-estorya mi ni Vice Guv Millan ug ni Board Member Ticky De Veyra nga dapat makahimo ta ug balaod para ang lokal nga panggamhanan adunay guidance. . to do an ordinance to make sure nga kanang bag-ong mga developers nga gusto magbutang ug taas nga mga buildings dapat naay anti-earthquake . .panglikay nga dili matumba pag naay kusog nga earthquakes,” dugang pasabot ni Gob AGR nga naghisgot sa gihimo sa nasod Japan.
Gawas sa linog ug ubang kalamidad ug sanglit ang kinabuhi labaw nga importante, ang administrasyon ni Gob AGR naggahin gayod ug pondo aron mapahimutang ang moderno, siyentipikanhong kasangkapan nga kanunay masaligan paghatag sa eksaktong impormasyon ngadto sa mga awtoridad ug mga Dabaonon ilabina panahon kung dunay baha.
