GIABOT gayod ang layo nga barangay New Balamban, Tagum City aron ihatod ang Festival of Services (FoS) caravan dala ni Gobernador Anthony G. del Rosario (AGR), Marso 7, 2019.

“Ga-anhi ang mga opisyales gikan sa provincial capitol, mga department heads karon adlawa aron dalhon ang mga serbisyo paingon dire sa New Balamban. . para matubag ang mga problema sa inyong barangay. Ania dire ang atong Department of Health, naa pod dire ang veterinarian. Kung gusto ninyo magtanom ug gulay naa pod dire ang agriculture para mohatag ug seedlings, naa pod dire ang environment, pang-sports. Silang tanan ania dinhi para moalagad ninyo. Kung duna mo’y kinahanglan, duol lang mo sa departmento nga makatubag sa inyohang problema. Ug tanang serbisyo libre ni siya,” pang-imbitar ni Gob AGR sa mga residente gikan sa New Balamban, Pandapan ug San Agustin.

Kauban sa iyang anak babaye, naghangyo si Mrs. Juliet Rescimilla Rubio sa Purok 7 ug igtatanom liso sa gulayon para sa ilahang luna nga may plano nga padaghanon pa.

“Nangayo ko ug igtatanom. Gihatag nila talong, kalbasa, petsay, cacao pod kay amo itanom maayo na lang. . Itanom gyod kay aron mamunga naa ta’y remembrance gikan sa DavNor. . Aron naa ta’y ma-kaon, ma-produkto. Naa man mi gamay nga luna, mangita ta’g matanom aron naa ta’y mapaabot sa mga anak, puhon, para ugma damlag. Bisag gamay ra, kun itanom modaghan gyod na kay mao man na’y kuhaan ug semilya,” matod ni Juliet uban ang panghinaut.

“Salamat kaayo, sa atoang gov, sa DavNor ug kang AGR pod. . Manghinaut mi nga magpadayon ang ilang mga plano sa tibuok district,” sugyot ni Juliet.

Si Mrs. Yolanda Bayang nga gikan sa barangay Magdum, Tagum City miadto gyod sa New Balamban aron makapangayo ug itanom nga kahoy.

“Kahoy. Narra, molave, basta 5-in-1 man daw ni, libre. Ni-avail gyod ko kay mahal man seguro ni. Itanom gyod nako ni kay bag-o mi nakapuyo diha, backyard nako walay mga kahoy, besides sa mga gulay,” pasabot ni Yolanda nga mapasalamaton tungod sa maayong epekto diha sa palibot.

“Nagpasalamat ko sa mga del Rosario sa kani nga project sa mga kahoy kay dako ni’g tabang sa katilingban. . Di lang nato mabantayan, dako na ni siya puhon. Lahi ang akong intensyon—nga malandongan among balay, makasagap ta ug fresh air sa atong residensya. Dako kaayo ni siya’g tabang. I suggest nga padayon ni siya nga programa nga maka-avail gyod tanang katawhan, kay ganahan jud ko sa balay magtanom, bulaklak meron din ako. How about kining mga kahoy nga mabugnawan ta,” matod ni Yolanda.

Bisan gani kung ang tawo dili gusto sa sobra 80 ka libreng mga serbisyo, gidapit gihapon sila ni Gobernador AGR sa lugaw ug paniudto nga pulos libre.

“Ang uban kung walay panginahanglan kung gusto lang paniudto, naa pod paniudto, way problema. Pwede lang mo moanhi mokaon. Kana tanan programa gikan sa probinsyal nga panggamhanan paingon dinhi sa inyo barangay New Balamban,” pasabot ni Gob AGR atol sa pagbukas sa FoS.

DavNor News