BISAN kung dako na ang pondo sa Syudad para sa iyang bayente-tres lang ka mga barangay, padayong gihatod sa probinsyal nga panggamhanan sa Davao del Norte ang sobra 80 ka mga serbisyo sa Festival of Services caravan alang sa barangay Mankilam sulod sa duha ka adlaw, Marso 18 ug 19.  

“Karong adlawa magsugod ang atong two-day Festival of Services. Mao ni ang serbisyo gikan sa probinsyal nga panggamhanan nga gidala namo sa matag barangay sa Davao del Norte. Gihimo na  namong duha ka adlaw tungod kay daghan pod mga barangay nagapangayo ug ing-ana nga serbisyo, kay daghan lagi nagkinahanglan ug tabang gikan sa gobyerno. Kamo dinhi sa barangay Mankilam ayaw sayangi ang duha ka adlaw nga oportunidad,” pasabot ni Gobernador Anthony del Rosario atol sa pagbukas gahapon Lunes, didto sa Mankilam Elementary School.  

Gipasabot sa gobernador nga una niyang gitutokan ilabina ang lagyo nga mga munisipyo sanglit gamay lang ang badyet niini kumpara sa Tagum City nga adunay dos (2) bilyones pesos nga badyet ug mas dako pa gani kay sa probinsya nga 1.6 bilyones pesos lang.    

“Kining atong Festival of Services ginabuhat nato ni sa tibuok probinsya sa Davao del Norte kay gusto nako dalhon ang serbisyo gikan sa probinsya paingon didto sa lagyo nga mga lugar. . Ang provincial capitol naa sa Tagum City. 1.6 billion ang kwarta sa probinsya (pero) atong ginatabangan ang 223 ka barangay ilabina kanang mga lagyo nga mga barangay, daghan mga problema. Dinhi sa Tagum City mas dako ang pondo sa syudad, two billion pesos. Pila ka barangay? 23. Ang probinsya 1.6 billion, 223 ka barangay. Mao na ang probinsya sa Davao del Norte nagtutok sa mga munisipyo kay ang mga munisipyo luoy kaayo ang kahimtang kay ang pondo 60 million, 100 million, 200 million, mao na ang pinakadako. Mao na sa paglingkod nako sa 2016 gitutokan nako ang mga munisipyo,” pasabot ni Gob AGR ngadto sa tanan nga nagtug-an nga gipakaylap ang sayop nga balita nga gipasagdan niya ang Tagum City.

Apan naalarma ang Chief Executive sa probinsya nga dili makaabot ang mga serbisyo sa mga lumulupyo sanglit daghang kapitan ang dili mosugot nga mosulod ang FoS sa ilang barangay.

“Ang serbisyo sa katawhan para sa katawhan. . Sa mga kapitan nga dili ipasulod ang mga serbisyo, ireport sa DILG para makasohan. Kay ngano man nga ilang ginababagan ang serbisyo sa gobyerno nga para na sa ilahang lumulupyo,” pahamangno sa Gobernador sanglit iyang nasayran sa pagsuroy nga bisan mga barangay sa Tagum sama sa Liboganon ug silingang dapit nag-problema ilabina sa tubig.

“Nahibal-an nako sa pagsuroy. . Karon naghimo mi ug bag-ong programa ang FoS+. Kauban ang mga department heads paningkamotan namo ang tanan problema matubag namo,” pasalig sa gobernador ilabina kung mapili siyang congressman.

Sa miagi lang nga semana, ang FoS caravan gikan naghatod sa mga serbisyo didto sa Barangay Magugpo East ug Magugpo South diin liboan ka mga Tagumenyos ang nakadawat sa libreng serbisyo.

DavNor News