PADAYONG GIHATOD sa probinsyal nga panggamhanan ni Gobernador Anthony del Rosario ang “Tamang Serbisyo para sa Kalusugan ng Pamilya” (TseKaP) uban ang pag-update sa records sa sobra onse mil nga mga AGR-sponsored Philhealth miembro nga nakaabot na didto sa Talaingod, Davao del Norte, Martes, Marso 19.

Nahatod na sa TSeKaP ang lain-laing medical nga serbisyo ingon man paghatag ug mga tambal didto sa New Corella ug San Isidro niadtong Marso 12 ug 13.

Mapasalamaton kaayo si Sto. Niño, Talaingod Kapitan Romeo Bucaron sa matag tuig nga pag-update sa 572 ka mga Philhealth miembro.

“Magpasalamat kita’g dako sa atong Governor Anthony del Rosario nga nagpadayon ang iyang programa nga TSeKaP, Philhealth ni programa. Adtong last year nagconduct gihapon ta ug renewal sa kaning Philhealth, so karon gipahigayon na usab ang pag-renew sa atong Philhealth sa matag usa nga miembro niini. Pasalamatan nato ang probinsya tungod kay nagpadayon ang programa alang-alang sa iyang katawhan dinhi sa Talaingod. Ako isip inyong barangay captain dako kaayo ko’g pasalamat kay 500 plus sa tulo ka barangay naka-avail niini nga Philhealth,” matod ni Kapitan Bucaron nga nagklaro sab nga wala gayod siya magpugong nga gamiton ang barangay gym alang sa maong kalihokan.

“Subo kaayo sa akoa kay nag-ingon sila nga dili daw ko magpagamit sa gym. Nganong di man ko magpagamit nga para’s katawhan man ni nga gym. Pero ang uban di daw sila magpagamit ug gym kay Hugpong daw. Unsa ma’y kalabotan anang Hugpong nga serbisyo man ni. Di ta mag-matter niana ang importante nga makadawat ta sa serbisyo sa atong probinsya alang-alang kini sa atong mga katawhan dinhi sa barangay Sto. Niño ug sa tulo ka barangay sa lungsod sa Talaingod. Karong buntaga welcome tang tanan,” pagklaro ni Bucaron.     

Ang Senior Citizen nga si Mrs. Adelina Bayo, taga Purok 2A Side 2 Sto. Niño, Talaingod mapasalamaton sa iyang nadawat medical nga serbisyo ug labaw sa tanan na-miembro sa Philhealth nga libre.

“Dako kaayo’g kaayohan. Makatabang pag-ayo parehas namo’ng mga pobre kay ma-ospital ka naa kay gisaligan, naa ka’y Philhealth. Pwede ra wala ka’y kwarta kay kung maghisgot ka’g hospital kwarta jud ang kinahanglan. .Dako kaayong pasalamat kang Governor nga naa siya’y Philhealth nga gipanghatag sa amoa nga mga kabos,” pasalamat ni Adelina.

Si Marynel Santoseldis duha na ang anak, 22 anyos nga taga Purok 1A, Sto. Niño, Talaingod mapasalamaton kaayo sa pagka miembro sa Philhealth ilabina panahon sa iyang panganak.

“Nagamit na adtong pagpanganak nako. . Maayo jud kaayo para sa akoa kaugalingon. Pasalamat ko kay Congressman del Rosario ug sa iyang pamilya sa iyahang nahimo nga kalamboan dire sa Talaingod. Daghan kaayong salamat ug molambo pa unta mi ug maayo,” pahayag ni Marynel.

Si Mari Paz Concencino nga usa ka Lumad maoy laing natabangan sa AGR-sponsored nga Philhealth kay kanunay na kining gigamit matag admit sa hospital.

“Kadaghan na sa hospital last year. . .Maayo kaayo sa tanang tao programa nila ni del Rosario. Angay nga pasalamatan nato tanan si AGR dako kaayo nga tabang sa katawhan dili lang kay ako; tanan, tanan nagbenepisyo ani nga programa,” matod ni Mrs. Mari Paz.

Ang administrasyon ni Gob AGR naningkamot gayod nga mahimong miembro ang tanang Dabaonon sa Philhealth aron matubag ang medical nga panginahanglan. Kung mag-“excess” sa Philhealth, maadtoan sab dayon ang Malasakit Center sa tanang publikong hospital sa probinsya aron walay bayaran ang tagtungod nga dili na kinahnglan mag-adto-adto pa ug mga opisina ug mga politiko.

DavNor News