DAKO KAAYO ANG PASALAMAT sa mga miembro sa San Miguel Urban Poor Homeowners Association, Incorporated (SAMUPHAI) nga gibayaran sa probinsyal nga panggamhanan ni Gobernador Anthony del Rosario ang ilang obligasyon ngadto sa National Housing Authority (NHA) kagahapon, Myerkoles, Marso 20 didto sa Big 8 Corporate Hotel, Tagum City.

Ang SAMUPHAI nga langkob sa tulo ka gagmay’ng asosasyon sa mga urban poor homeowners adunay 343 ka miembro nga nakatag sa 4.7 ektaryas nga luna diha sa Cuambogan, Tagum City ug duna pa’y balanse nga bayronon ngadto sa NHA nga sobra P2.899 milyon pesos.

“Nagpasalamat jud ko’g dako nga naimpas na ang among lote kay ang mga miembro mao man gyod na’y gipangandoy nga impasan ang among lote. So nagpasalamat ko’g dako nga wala na sila’y hunahunaon; ang mga tao ang pinaka-importante sa akoa nga dili sila lisod,” matod ni Ms. Lani Bolivar, ang presidente sa SAMUPHAI.

Dugang sa presidente nga bisan wala pa ma-congressman si Gob AGR iya nang gisaad nga impason ang kantidad nga gisugdan sa panahon nga si Arrel Olaño pa ang congressman.

“Mao pod na ang gisaad niya sa amo. . Makahulat man gyod ang mga miembro. Pasalamat ko sa atoang governor karon kay ang SAMUPHAI mao na ang na-tap sa Davao del Norte, diha gyod namo gipaslak adto nga panahon kay siya ang midawat ana nga program, time ni Congressman Olaño. 6.1 milion man na siya. Naghatag, nagbilin si Congressman Olaño tong 2010 ug 2.4 million para gibayad partial sa 6.1, so karon ang balance mao nang gibayaran ni congressman AGR, ah Governor AGR. So pasalamat ko hasta akong mga miembro nagpasalamat jud pod sila kay mao man na’y ilahang gi-wander ba nga mabayaran,” kinasingkasing pahayag sa presidente alang sa iyang mga miembro.   

Si Julieta Gamolo, miembro sa Saint Joseph Homeowners, usa sa tulo ka mga asosasyon nga sakop sa SAMUPHAI todo pasalamat sa tabang nadawat.

“Ang akong ikasulti ngadto sa gobyerno labi na kay Governor Anthony del Rosario, salamat kaayo sa imong pagtabang nga imong gibayaran ang among utang ngadto sa National Housing Authority. Dako kaayo among pasalamat,” matod ni Julieta.

Gikalipay sab ni Gobernador Anthony del Rosario nga dili na mabug-atan ang mga sakop sa asosasyon nga wala mag-obligar sa mga sakop sa SAMUPHAI.

“Ganiha nag-turn-over ta sa 2.9 something million pesos, granting sa utang sa SAMUPHAI. Unya samtang nag-picture taking mi dinhi nag-ingon si maam, bayaran pa ba namo na sa province? . Nangutana siya, bayronon pa ba namo na? Unsa ma’y ikasulti nako. Kamo na ang maghukom kung gusto ninyo bayaran, inyoha man nang kwarta na,” pahayag ni Gobernador AGR atubangan sa mga opisyales ug sa halos usa ka libo nga mga urban poor homeowners.   

Sa pagbayad sa obligasyon sa SAMUPHAI, nagpasalamat ang representante ni NHA-OIC Regional Manager, RO XI Rolando Teves, Jr. sanglit ang maong kantidad magamit na sab alang sa laing housing projects.

“Thank you Provincial Government of Davao del Norte lalong-lalo na kay Governor Anthony del Rosario nga nag-assume ng financial obligations ng SAMUPHAI. Nagapasalamat mi nga kana nga financial obligations nga gi-assume sa probinsya mao gihapon na siya, kana nga kwarta amo gihapon na siyang gamiton sa lain nga projects para sa katawhan lalo na dire sa Davao del Norte. Daghan kaayong salamat sa gibuhat ninyo.”

Ang pagturn-over sa bayad ngadto sa NHA atol sab sa usa ka adlaw nga Orientation on Disaster Preparedness alang sa mga urban poor homeowners sa Tagum City sanglit ang syudad kanunay nga gibisita sa baha, linog, bagyo ug ubang hinimo sa tawo nga kalamidad.