WALAY segunda klase, walay LGU nga gibiyaan ug sa ikaduhang higayon gihatod gayod sa administrasyon ni Gobernador Anthony del Rosario ang halos otsenta ka mga serbisyo sa Kaputian District, Island Garden City of Samal nga gilangkoban sa kinse ka mga barangays alang sa duha ka adlaw nga serbisyo Marso 20 ug 21.

Ang Davao del Norte nga adunay 223 ka mga barangays, niadtong Septyembre 2018, una nang nahatod ang FoS didto sa Talicud Island sulod sa lima ka adlaw alang sa upat ka mga barangays niini. Alang sa ikaduhang paglibot niini, isunod sa Kaputian district pagka Sabado ug Dominggo (Marso 23, 24) ang Peñaplata district dayon ang Babak district pagka Lunes ug Martes (Marso 25 ug 26).

“Kining Festival of Services mao gyod ni ang flagship program sa atoang kasamtangang Governor AGR Anthony del Rosario. Imbes kamo’y moadto sa probinsya, ang probinsya maoy nagpaduol sa inyoha dire. Originally lima ni siya ka adlaw, 80 to 100 ka mga serbisyo. . free medical check-up, tambal, naa po’y minor surgeries, ibot ngipon, mali sa birth certificate or marriage contract ma-correct. . Karon balik mi sa IGaCoS, duha ka adlaw sa Kaputian, duha ka adlaw sa Babak, duha na pod ka adlaw sa Peñaplata. Ingon ana mo ka-pangga, kamahal. Mianhi gyod ang probinsya para mohatag ug serbisyo sa inyo,” matod ni Board Member Raymund Joey Millan nga maoy naghatag sa mensahe alang sa probinsya.      

Bisan kung tagduha lang ka adlaw sa matag district, si IGaCoS Vice Mayor Orly Amit nakadayeg sa gihimo nga FoS.

“Excited pod mi nga mosuroy kay gusto pod ko magpa-manicure, unya pa-masahe. Lamia ning serbisyoha no? Mao ni serbisyo nga tininuod ba. Daot imong ngipon, ayohon. Daot imong lawas, ayohon. Gusto ka magpa-manicure, mag-patupi. Kung unsa inyong pangayoon naa, Kung gusto mo mangayo’g kwarta, tua’s pikas. Kining amoa dire serbisyong pangkalawasan. I-text ninyo to’ng uban basin naa mo’y silingan nga nagluya, sakit ang ngipon ug bisan duna mo’y silingan nga dunay problema sa bana, sa asawa, pwede moanhi kay naa dire mga abogado, abogada. Ug naa pod gusto magpakasal pwede, karong 26. Tanan ninyong mahunahunaang serbisyo naa dinhi. So atong pasalamatan kay basta del Rosario,” matod ni VM Amit nga gisumpayan sa mga mitambong ug “segurado.”  

Si Poblacion barangay captain Alfredo Palacio, Sr. mapasalamaton alang sa mga katawhan uban ang pagdayeg nga kini ang pinakadako nga iyang na-encounter.

“Pasalamat mi ning programa ni Gov nga nakabenepisyo mi kay ang katawhan maka-avail ug maka-cater sa ilang problemang ginagmay’ng mga sakit. . Daghan na kaayo ing-ini nga programa pero first time pa nako ni nga encounter nga pina-kadako nga medical mission. Nagpasalamat ko sa tanan nga misuporta ug pasalamat pod ko sa atong gobernador nga mihatag aning klase nga programa ug akong gipanghinaut magpadayon unta ni,” matod ni Kapitan Palacio, Sr.  

Si Kapitan Wil Esguerra sa laing barangay sa maong district nanghinaut nga magpadayon ang “makalipay” nga programa.

“Among gikalipay kining gipahinabo karon ug nanghinaut mi nga dili lang karon kundili duna pa’y mousab. . Nagpasalamat mi labina sa provincial government kang Governor AGR nga naghatag siya ug kalipay sa mga katawhan nga siya gyod ang nagdala sa panglawas ug sa material,” pahayag ni Kapitan Esguerra.

Nanghinaut sab si Colita Esguerra, 84 anyos nga “dili na maputol” ang Serbisyo Caravan.

“Karon nag-84 ko nanghinaut ko sa kanunay di na ni maputol. . .Syempre magpasalamat gyod ta kay nakatabang man sila. Salamat sa provincial governor,” matod sa 84 anyos nga si Esguerra.

Kini na ang ika-31 nga paglibot sa Festival of Services sa Davao del Norte.

DavNor News