NAGTAOB ang mga tawo nga midagsa sa unang adlaw sa mga serbisyo nga hatod sa Festival of Services (FoS) ni Gobernador Anthony del Rosario didto sa Nieves Villarica National High School, Babak District Island Garden City of Samal, Lunes, Marso 25.

Sa unang adlaw, ang rekord sa nagpakita nga miabot ug tulo ka libo upat ka gatos kalim-an ug upat (3,454) ka mga tawo gikan sa lain-laing barangay sa Babak district ang nahatagan ug serbisyo didto sa luag nga hawan sa eskwelahan

“Wala siya maka-interrupt kay human naman ang exam. Ang mga bata kung moanhi mag-practice na lang. Ang mga bata lang ang akong gitagaan ug bale holiday nila for two days kay two days man pod ning atong serbisyo dinhi pero ang mga teachers as is lang sila kay busy pa sila’g reading sa mga grado kay maghimo ug card, mag-compute pa ug mga grado para sa mga honors,” pagklaro ni NVNHS principal Joserami Paclibar, Sr. nga walay nabalda nga mga kalihokan.

Giisip sa school principal nga ang hatod nga FoS dako gayod ug tabang bisan sa iyang mga estudyante.    

“Dako gyod ni’g ikatabang. Gawas sa atong katilingban dinhi sa Babak nga makatabang sa ilang panglawas, makatabang pod sa akong mga estudyante. Imaginon nimo ning 2,400 ka mga estudyante, definitely naa gyo’y mga problema sa ngipon, sa panglawas. Giingnan nako silang mga teachers nga you just report because we have our medical mission, we want our students to avail. Kinahanglan naa gyod tang mga teachers kay magpabilin man gihapon ta bisan way mga estudyante. Usa sila paulion ninyo kinahanglan maka-avail sila sa gipang-offer dinhi nga services.”

Sa pagbukas sa Babak FoS, gipahinumdum ni Senior Board Member Rodolfo del Rosario, Jr ang taas nga katuigan sa pagserbisyo sa pamilyang del Rosario nga walay mantsa nga korapsyon o nga nag-atubang ug kaso.  

“Unsay ibig sabihon ng public services? Serbisyo talaga. Suportahan nato ang atong mga ka-linya dinhi sa Davao del Norte para usa lang ang tingog, usa lang ang plano, parehas ang vision, parehas ang mission ng tanan. Para pag mag-plano ta ug mga programa, mga activities magkasinabot ang tanan. Yan ang importante kaayo. So daghan ang serbisyo dire i-maximize nato. Kung duna pa ta’y mga silingan, pamilya nga dili pa nakabalo sa Festival of Services, sabihan nato para makadawat sila ng serbisyo,” pasabot ni BM Rodney del Rosario, Jr. nga nagpasalamat sa school principal sa NVNHS ug sa unom ka kapitan sa barangay Villarica, Kinawitnon, Toril, Cogon, Miranda ug Tambo.  

Gipasalamatan sab ni school principal Paclibar, Sr si Davao del Norte Governor Anthony del Rosario  tungod sa daghang benepisyo nga nakuha gikan sa FoS

“Nagpasalamat lang pod ko nga dinhi ang atoang medical mission nga gihatag ni Governor kay nasayod ko nga dako nga part sa akong mga estudyante ang maka-benefit. Seguro sila wala kaayo’y higayon nga makaadto sa doktor kay busy naay klase unya usa pod ang financial. So dinhi at least naka-avail sila sa libre. Mao na nga nagpasalamat gyod ko ug dako nga dinhi gi-host.”

Kini na nga FoS sa Babak ang dunay pinakadaghan nga naserbisyoha sa unang adlaw pa lang sukad nga milibot ang FoS niadtong Pebrero 2018.

DavNor News