TUNGOD sa dili pagsinabtanay kay mahal ang singil-pletehan, gitun-an karon nga ipatuman ang pagbutang ug “metrohan” sa nag-unang de-pasaheroan sa Tagum City, ang traysikel nga gibunyagan ug “Trayxi.”  

Sa iyang State of the Province Address (SOPA) nga gipahigayon Myerkoles, Marso 27, gibutyag ni Gobernador Anthony del Rosario nga iyang gi-pangutana ang katawhan pinaagi sa iyahang Facebook post “unsa ang TOP FIVE PROBLEMS sa syudad nga angay’ng tutokan” ug migula nga ang pinaka-una angay’ng hatagan pagtagad mao ang problema sa plitehan sa traysikel nga nahimong hinungdan pa sa panaglalis sa drayber ug pasahero.

Naobserbahan nga misamot ang di-pagsinabtanay ilabina kung ting-ulan ug kadaghanan nahulog na nga pakyawan sanglit mobungat ug kantidad ang drayber una pa ihatod ang pasahero.   

“Na-shock ko kay ang akong nasakyan nga pedicab naay metrohan, mora pod ko’g nakasakay ug taxi. Mora’g mao na seguro na sir ang kuan sa panaglalis sa pedicaber ug pasahero dire sa Tagum kay dugay na gyod namo na gina-mulo ba. Kay ang drayber usahay maningil ug sobrang pamasahe ug usahay pod ang pasahero dili pod mohatag sa hustong pamasahe. Maayo na siya kay naay metrohan, 10 ra minimum unya lahi pod ang sa senior citizen,” matod sa isa ka Ginang nga nakasakay sa usa sa duha ka traysikel-pasaheroan nga gi-pilot pagbutang ug metrohan.

Ang “trayxi” kun metered tricycle lahi sa taxi sanglit ang ikaduha ug sunod pa nga mga pasahero dili parehas ug mabayran sa unang pasahero. Aduna kini “calibration” nga magpaila pila ang mabayaran sa maong distansya.

“Para ing-ana di na mailad ang pasahero para di pod mailad ang drayber. So karon pa ni nahitabo nga ing-aning by kilometer. Kay ang naka-nindot lang kung mohunong ang drayber, pondo ang bayad, walay additional; lahi sa taxi nga kung mopondo naay bayad ang pasahero. Mao na nga nagapasalamat ming mga pasahero nga dili na mi mailad gyod, bisan layo-layo, pero ang among bayaran ubos ra gyod,” matod sa laing misis nga naka-testing sakay sa “Trayxi.”

Ang metrohan sa “Trayxi” mo-kwenta pod pila ang pletehan sa senior citizen, estudyante ug bisan Persons with Disabilities (PWDs).  

“Okay kaayo uy! Kay part sa akoa, senior na man gyod ko, discounted na siya, naa na sa meter ang discount ug ang mga estudyante kay makahibalo na sila pagtan-aw pila gyod ang ilahang mabayaran sa pamilite. So lipay kayo ko nga naing-ani, metered traysikel naa dire sa Tagum. . unta madugangan para modaghan maka-avail jud tanan katawhan sa Tagum,” matod sa usa ka senior citizen nga wala magdahom ang metered “trayxi” diay ang nasakyan.

Bisan ang mga “trayxi” drayber okey sab sa giplanong pagbutang ug metrohan sa ilang sakyanan.

“Kung mahimoan ni siya’g ordinansa nga ma-legalize jud siya nga mabutangan para patas gyod tanan, wala na’y problema. . . Pasahero ug drayber happy. Agree ako sa metered tricycle,” matod sa usa ka drayber nga taud-taod nang namasahero sa Tagum.

“Drayber ug pasahero happy gumikan kay naa mi metrohan, walay lamangan sa pasahero ug ako, patas mi. Agree ako sa metered tricycle,” komento sab sa laing drayber nga nag-sideline pagka-dispatcher sa Philtranco.

Ning pagsulat duna pay dugang pagtuon ang himoon aron gayod ang “trayxi” makatubag sa di-pagsinabtanay sa drayber ug pasahero.  

DavNor News