ABRI NA ang sobra P3.3 milyones nga Banana Tissue Culture laboratory sa Davao del Norte.

Ilawom sa BEST PEOPLE development agenda ni Gobernador Anthony del Rosario (AGR) sa pagpanguna sa Provincial Agriculture Office (PAGRO), ang unang letrang “E” (Enhanced Agri-aquaculture) gitumong sa padayong paningkamot nga mangita ug siyentipikanhong pamaagi nga mapadako ang produksyon lakip na ang pagsumpo sa sakit sa saging Cavendish nga giilang Setenta porsyento (70%) nga tig-amot sa ekonomiya sa probinsya.

Gipasabot ni DavNor Provincial Agriculturist Dr. Ann Notarte nga ang pagbaton sa probinsya sa laboratoryo maoy dakong tabang ilabina sa gagmay’ng tigtanom sa numero uno nga “DavNor dollar-earner” ang Cavendish banana, sanglit kini maoy barato kung itandi sa gawas nga 20-25 pesos.  

“Kining atoang Banana Tissue Culture Laboratory na-establish ni last year pa from the funds of Department of Agriculture High Value Commercial Crops Program sa Region XI. . P1.5 million funds for the building and the fixtures ug nadugangan ug P520,000 for the equipments. Ang atong provincial government naghatag pod ug dakong pondo para sa operational costs, direct costs involved sa banana tissue culture seedlings, 1.3 million,” komento ni Dr. Merlina Juruena sa Agricultural Support Services section.  

Ang variety GCTCV 218 nga nailhang mosukol kontra sakit nga Fusarium Wilt ug ang paborito nga Grand Nain ang kasamtangan gi-tissue culture.

Kahinumduman nga human sa bagyong Pablo niadtong 2011, ang tubig baha nagdala sa kagaw Fusarium nga daling nag-apektar sa sobra 600 ektaryas sa Cavendish banana sa Davao del Norte. Sa tuig 2015 milapad pa ang kadaot ngadto sa sobra 13,700 ektaryas nga kinahanglang walaon pinaagi sa paggamit ug maayo-resistensyado nga semilya pinaagi sa tissue culture.

“It would take six to seven months gikan sa saha, gikan sa corm nga extract nato hangtod ma-produce ang gitawag nato ug merry plants nga ready to plant na siya sa nursery, dayon matanom na siya sa atong mga farmers. . Mabaligya nato na sa subsidized price nga fifteen pesos. Kung daghan na, pwedeng makapalit ang walk-in nga kliyente apan hatagan gyod ug prayoridad ang mga gagmay indibiduwal nga tigtanom ug saging sa Davao del Norte,” padayong pasabot ni Dr Juruena.  

Gawas sa GCTCV 218 ug Grand Nain, ang DavNor PAGRO pwede sab mag-culture ug laing variety sama sa Lakatan o bisan Cardava nga saging apan pinaagi unya sa ‘order-based.’

DavNor News