DUNGAN sa kalipay sa pagsaulog sa ika-49 nga Araw ng Davao del Norte, gipangunahan ni Gobernador Anthony G. del Rosario ang katawhang Dabaonon sa paghudyaka tungod kay opisyal na nga milingkod si Presidente Rodrigo Duterte.

Si Duterte mao ang ika-16 ug pinakaunang Mindanaoan nga nahimong presidente sa Pilipinas.

Uban sa kalipay, nananawagan sab si AGR sa iyang kaubang mga local chief executives nga bug-os suportahan ang agenda sa bag-ong Presidente.  “Isip mga executive officials, mga local executives sama nako ug sa uban mga governors, mayors, ato gyod seguradohon nga tumanon gyod nato ug ayohon gyod nato sa pag-implementar ang tanang mga balaod. Mao lang na ang ginahangyo sa atong Presidente,” matod ni Gob AGR sa usa ka interbyu human gayod sa programa sa ika-49 nga kasaulogan sa Davao del Norte.

Gidugang sa bag-ong milingkod nga gobernador nga nahimong “Best Performing Congressman” sa miaging ika-16 nga kongreso, nga iyang nakita nga daghan na kaayong mga balaod ang nasod ug nga nagkinahanglang lang kini ug implementasyon.  “Daghan gyod ta ug mga balaod. As a matter of fact morag moabot na man ug 10,000 plus ang atong Republic Acts. And yet ang isa sa nakita natong problema especially the executive branch is the proper implementation. Tanang mga problema, nahimoan na ug balaod sa kaulohan. Ang problema, implementation. And the thrust of the incoming administration of President Rody Duterte nga iyaha gyod ning i-implementar ug sakto ang balaod, walay exceptions. Mao na ang usa sa iyang mga mensahe nga iyang gisulti gahapon didto sa iyahang inaugural address,” dugang pahayag ni AGR..

Sa iyang bahin ug ingong gobernador sa Davao del Norte, gipasalig usab ni AGR nga iyang paneguroon nga ma-implementar ang balaod alang sa tanan nga walay gidapigan, lakip na angkampanya batok sa druga, kriminalidad ug korapsyon. (pioDavNor)