NAPULO sa onse ka mga Local Government Units (LGUs) sa probinsya sa Davao del Norte ang modawat ug Seal of Child-Friendly Local Governance gikan sa Department of Social Welfare and Development Office R-XI base sa resulta sa inter-agency Child-Friendly Local Governance Audit (CFLGA) 2018.

Nga gisugdan niadtong 2014, ang mga sukdanan naglakip sa: Pag-ubos sa gidaghanon sa kamatayon sa kabataan singko anyos paubos; pag-us-os sa gidaghanon sa kabataan nga ubos ang timbang unom ka tuig paubos; pagtaas sa gidaghanon sa 3-4 anyos nga kabataan nga nag-eskwela ug Day Care; pagtaas sa gidaghanon sa mitapos ug elementarya; pag-ubos sa child-labor; pag-ubos sa gidaghanon sa biktimang kabataan sa kagubot, pang-abuso, gibiyaan ug pinasagdan; plano alang safety sa kabataan diha komunidad ug eskwelahan; pag-apil sa katungod sa kabataan sa paglambo diha sa development agenda sa LGU; ordinansa nga magbutang ug Violence Against Women and Children (VAWC) desks; adunay Philhealth alang sa Maternal Care Services ug Primary Care; Local School Board Plan nga kalakip sa School Improvement Plan (SIP) ug nakahuman na sa LSB Plan balik pa niadtong 2013.

“Naa dire sa guidelines. . within 0-6 kumpletong immunizations, malnutrition, education participation rates, drop-out rates, mga VAWC cases,” matod ni DavNor PSWDO department head Rosalinda Rapista nga naghingalan ug pipila sa 12 ka mga criteria nga gibasehan.

Ang mga LGUs sa Sto. Tomas, Braulio E.Dujali, Carmen, IGaCoS, Tagum City, Asuncion, San Isidro, Panabo City, Kapalong ug New Corella mao ang modawat sa Seal alang sa miaging 2018.

“Last year nakapasar ang Talaingod, unya ang San Isidro hinuon nga pila na ka years way pasar-pasar, karon kapasar sila. Inter-agency man gud ang nag-rate sa matag LGU based anang twelve ka criteria,” dugang ni Ms. Rapista nga nagbutyag nga ila gyod gitabangan ang tanang LGU pinaagi sa paglingkod ug pagtudlo kanila.

“Nagahimo ta’g orientation sa ilahang level sa tanan, tabangan sila unsaon pag-come-up anang criteria. With DILG nag-conduct ta ug orientation sa LGUs. Mag-sit down, mag-discuss unsa ‘tong ilahang kulang, sila na pod ang mo-work sa ilang mga LGUs. . .Dili pod mi kahibalo kung asa sila nag-fall short sa twelve nga ilang bantayan sa guidelines kay wala man gud nila ginahatag ang result,” matod sa DavNor PSWDO head uban sa panghinaut nga unta mopasar na ang tanang LGUs sa DavNor sa sunod nga pag-awdit.

Ang mga ahensya sa DSWD, DOH, DILG, DepEd ug uban pa mao ang nag-assess sa mga LGUs labot sa kalidad paghatod serbisyo ngadto sa mga kabataan diha sa ilang komunidad.

Niining pagsulat wala pa mahibaloi kanus-a ang awarding.

DavNor News