GISUGDAN na ug bisita sa kapolisan ang mga establisamento nga nagbaligya ug mga produkto nga naghimo sab ug “pay-in, pay-out” nga kalihokan sa pagseguro nga kini adunay angay nga mga dokumento alang sa legalidad, Huwebes, Mayo 30.

Kauban ang media, gipangunahan mismo ni Regional Director XI Police Brigadier General Marcelo Morales ang pagbisita sa GP Load Cards and Wellness Products Marketing (nga matod pa kanhi Grappler), nga nahimutang sa Doctolero Avenue, Tagum City.

“Yes we have visitorial powers. The PNP can visit any establishments, nasa batas yun. We can conduct any visitation,” matod ni RXI Police Director Morales nga nagklaro atol sa press conference.  

Hinuon giklaro sa hepe sa kapolisan sa Rehiyon XI nga ang pagbisita dili ingon nga “raid” o kaha aron pasirhan ang usa ka establisamento kundili ang pagtino kung kini nag-operate ba nga adunay legalidad ilabinang ang produkto nahimong “front” sanglit nagadawat sab kini ug mga “pay-in, pay-out” gikan sa mga “investors.” 

Nasayran sa pagbisita sa ‘GP’ nga aduna kini lain-laing produkto nga gitanyag apan walay Opisyal nga Resibo bisan Provisional Authority nga gipakita ingong pagtugot gikan sa Bureau of Internal Revenue (BIR). Ang DTI Registration ug Business Permit nga gi-isyu sa syudad sa Tagum mao lamang ang gipakita sa nagbisita nga kapolisan.

Labot sa iyang kapolisan, seryoso si RD Morales nga iya gyod tinud-on ang pag-sampa ug kaso kanila human mapamatud-an nga nag-apil sa mga “investment schemes” ingong paglapas sa Code of Ethical Standards ug bisan insubordination.

“Malalaman naman ninyo pag may nasampahan na kaming mga PNP personnel. Talagang nagko-conduct kami ng investigation sa mga PNP personnel na sumasali dito. Hindi ako nagbibiro. I’m serious. I will file case against them kahit sino pa sila,” pagklaro ni Morales. 

Human sa Tagum City, gisunod pagbisita ang usa ka branch sa “Rigen” nga nahimutang sa National Highway, Carmen, Davao del Norte diin nabungkag ang naglinya nga mga tawo.

Sumala sa iyang business permit gikan sa lungsod, nasayran nga nag-retail kini ug mga “pharmaceutical, medical, cosmetic, toilet articles” apan walay mga produkto nga naka-displey atol sa pagbisita ug naghimo sab ug “pay-in, pay-out” matod sa duha ka kostumer sa gawas.

Gipasalig ni RD Morales nga sinugdanan pa lang ang ilang gihimo ug susihon gyod ang tanang mga investment marketing nga nag-operate.

DavNor News