GIPADAPLIN ang kanhi managlahing panglantaw, naghiusa ang probinsyal nga panggamhanan ug lungsod sa Asuncion aron mahatod ang gikinahanglang serbisyo pinaagi sa Oplan TApok sa Barangay Alang sa Galisod ug Nanginahanglan (Oplan TABANG) sa Barangays Sonlon, Binancian, Buan ug Camansa.

“Sa atoang gobernador mao gyod ang nangusog nga ang serbisyo mahatod sa amoa mismong tugkaran. Ang inyohang mayor uban sa atong Sangguniang Bayan nagsuporta sa tanang kalihokan. Sa coordination meeting, miingon ang taga-province nga mayor ipahitabo ang Oplan TABANG, kung mahimo suportahi. Kabalo ko gi-bidding pa daw ang anaesthesia. . Maayo na lang kay naa’y stock ang munisipyo mao nga akong gihatag dire. Ako po’ng gimandoan ang tanan natong department heads moari dire tulo ka adlaw; naa tay gipadala nga mga dentists, doctors, nurses, midwives ug atoang social workers aron mo-assist sa pag-deliver sa mga serbisyo. Ang importante basta makaayo sa katawhan sa Asuncion ato gyod nang suportahan. Makaasa gyod mo nga atong ipadaplin ang tanang natong mga deperensya para ma-deliver gyod nato ang serbisyo kaninyong tanan,” matod ni Asuncion Mayor Atty. Eufracio Dayaday, Jr.

Kasagaran sa mga barangay nga naa sa nahilit dili na magpa-check-up tungod sa distansya ug kwarta.

“Giuna nato ang mga GIDAs barangays. Mao kini ang atong gipasabot nga ang serbisyo sa gobyerno dili na lisod abton kay mao na’y mianhi dire. Daghan sa atong mga kaigsoonan nga dunay balatian dili moadto sa ospital di na magpa-check-up kay naglikay sa bayronon. Sugod niadtong July 1 libre na ang atong mga government hospital apil ang mga tambal. Wala na’y rason nga dili mo magpa-check-up labina sa mga Senior Citizens kay diha magsugod ang sakit, para dili na molala. Kami na ang mianhi para gyod mo ma-check-up. Kung nakita sa atong mga doktor nga kinahanglan ipadala sa ospital, automatic ato dayon ipadala,” pasabot ni Gobernador Edwin (Kuya Gob) nganong giuna ang mga barangays sa Asuncion KAMADI district.

Gibutyag sab ni Kuya Gob nga paningkamotan sa probinsyal nga panggamhanan nga itagana ang mga seedlings kauban ang mga munisipyo aron matamnan ang mga bakanteng yuta sa mga Lumad.

“Tanan nga mga CADT ug mga yuta sa Lumad ato ning tamnan. Paningkamotan nato sa probinsya kuyog ang atong municipal mayor, vice mayor ug council, atong mga barangay captains, magtinabangay para moasenso ang inyong pamuyo, moasenso ang lungsod ug moasenso ang katibuk-an sa Davao del Norte. Mao na’y atong giingon karon nga One Team, One DavNor,” pagbutyag ni Kuya Gob.

Hinuon gihangyo sa gobernador ang kooperasyon ilabina ang pagtaho sa kadudahan nga mga tawo.

“Kung dunay mga kawatan, adik ug unsa pa’y kaduda-duda ayaw mo kahadlok i-report. Magtinabangay ta. Mao ning meaning nga One Team, One DavNor kay dili lang kami mga opisyal ang magpakabana para sa inyoha kundili kamo usab kinahanglan nga mo-participate,” panawagan ni Kuya Gob sa publiko.

Tulo gayod ka adlaw ang Oplan TABANG nga naghatod sa sobra singkwenta klase-klaseng serbisyo.