HALOS USA KA ORAS nga naghulat si Gobernador Edwin I. Jubahib ug mga kauban una pa kini gipasulod sa gwardya sa Lapanday Fruits Corporation sa tuyo nga pangunahan ang magsurbi sa karsada nga nagdugtong sa barangay Apokon ngadto sa Madaum ug San Isidro, Oktubre 25.

Bisan ang Provincial Legal Officer Atty. Charina Cabrera mihangyo aron dili mabulad sa init.

“Open na unta Maam para makasulod ang mga sakyanan kay init kaayo. . kay mawala mi sa among timetable kung di madayon karon ang survey,” hangyo ni Atty. Cabrera sa admin staff sa LFC nga gipaablihan pod dayon sa gwardya.

Kahinumduman nga niadtong bulan sa Agosto, “nagkasabot” si Kuya Gob uban ang mga opisyales sa Tagum City nga mobalik Oktubre 25 aron surbihon ang karsada gikan sa Apokon lahos sa Madaum ug San Isidro nga gibana-banang 4.5 kilometros.

“Kadto man gud initial pag-ari nila sa una, ang actual nga karsada misimang sa nia sa titulo. Mao nang reason nga mamalik karon para makuha gyod ang actual nga location sa technical description, kay di man pwede molihok ang LGU kay basin magkamali ta,” pasabot ni Atty. Cabrera sa admin staff.

Tungod kay pirmeng sirado ang gate, kinahanglan pa nga molibot ang mga motorista didto sa Crossing Hijo padulong Maco. Ang singko hangtod siete minutos mahimo nang sobra baynte minutos nga biyahe.

“Bike-kon ra gani na sa uban. Sa una naka-experience mi nga ila gyod nang gi-lock-down, dire mi agi crossing hijo, pwerteng layoa gyod. Patuyokon kay bawal dire, private road ni. Luoy tawon, layo kaayo. Seguro dire daganon mokaon ra ug mga siete minutos, singko minutos pinakadali kung dili lapok. Ug didto, mokaon ug baynte kapin, baynt-singko. . Pinaka-pabor kay straighton singko minutos ra gud na,” matod ni Reno nga ang asawa trabahante sa Hijo banana plantation.

Si Marino Liwan nga residente duol sa gate nagpamatuod nga kanunay’ng serado gawas lamang sa mga trabahante sa sagingan.

“Nakabantay ko adtong aging bulan nag-anha na sila diha, serado gihapon. Ang koral sa una, kawayan. Pila to ka semana na-steel na. Ang guardhouse sa una dire sa gawas. Pagka-karon nakasulod unya steel na. Pag-abot gyod namo dinhi wa na’y makaagi kay gialihan ug kawayan. Bisan motorista di sila kaagi, bisan tawo gawas lang sa mga trabahante nila pero kaming mga public, private nga motor, di gyod makaagi dinha kay alihan man sa gwardya,” matod ni Marino..

Si Tagum City Vice Mayor Lorraine Estabillo nga miabot human nakalakaw si Kuya Gob misulti nga pangunang katuyoan ang pag-survey uban ang panghinaut nga mabuksan na alang sa kasayon sa publiko ilabina panahon sa emerhensya.

“Nihangyo man gud ta kay naay discrepancy sa technical description. Mao na nga nia mi karon i-survey man lang siya. . .Para man gyod sa publiko ang dalan, public thoroughfare, so para sya sa tao. So kailangan ma-abri kay mas duol man gud. Naay community didto ang Madaum, naay mga emergencies, at least duol na lang dire instead nga molibot pa sila ug Maco or motuyok pa ug Canocotan, layo na kaayo,” matod sa bise-mayor.

Tungod sa halos usa ka oras nga paghulat, nasermonan ang mga gwardya nga naghangyo sab nga pasayloon sila kay nagtuman lang sa mando.

“Ang ako adto nga pasudlon kay palingkoron si Gob. Dili man pwede. Sige ma’g tawag “standby” lang sa. Trabaho lang gyod ning amo kay bisan kamo unsa’y instruction sa labaw, bisan sa military, sa police, tumanon gyod nila, just an order. Bisan supak sa among kabubut-on kay naa si Gob diha, “standby” man ang order, so amo gyong gi-utong. Moduol gani unta mi ganiha kay mangayo mi’g pasaylo nga sir, pasensya na, mao ma’y advice nila. . .Sa amo unsa’y advice amo gyong tumanon, bisan manga-tanggal mi, trabaho man, dili sad mi makig-away. . Kamo na’y mopaabot kay sir nga mapasaylo ang guwardiya,” hangyo ni Pol nga ipaabot ngadto kang Kuya Gob.

Sobra 100 days pa lang gikan sa pagserbisyo ni Kuya Gob apan gipaningkamotan gayod nga mabalik ang publikong dalan ingong pagtuman sa mando ni Presidente Duterte pinaagi sa DILG.

Niadtong Oktubre 23, human sa panagsabot nga gipahigayon ni Secretary Piñol sa MinDA, abli na sab sa publiko ang dunay gate nga mga karsada sa TADECO.

nawad an pikas stainless cane in lieu sungkod   kawayan

 

nawad an pikas dr parrenas

 

DavNor News