MAAYONG BALITA alang sa taga Island Garden City of Samal labina sa mga residente sa Talicud Island.
Atol sa paghatod sa Oplan Tapok sa Barangay Alang sa Nanginahanglan ug Galisod (Oplan TABANG) Huwebes, Nobyembre 7, gibutyag ni Gobernador Edwin I. Jubahib (Kuya Gob) nga giplano na karon ang pagtukod ug hospital sa Talicud Island ingon man ang pagpalambo sa turismo sa isla alang sa kaayohan sa tibuok probinsya.
“Kami ni Mayor Al David Uy ug Vice Mayor Guindolman naa sila’y proposal nga hospital sa Talicud. Ingon ko ni Mayor nga kung naa siya’y ready nga budget ana nga hospital kinahanglan matukod na ug dili karong tuiga sunod tuig, then kung unsa’y kulang mao pod nang akong i-support sa provincial government, ang facility sa hospital,” pagbutyag ni Kuya Gob atubangan sa mga residente sa barangay Cogon, Linusotan, Dadatan ug Sta. Cruz ingon man sa taga Kaputian.
Matod sa gobernador nga gihimo ang Oplan TABANG ingong sumpay sa gihimo sa iyang administrasyon nga “zero-billing” sa tulo ka provincial hospitals gikan sa ilang paglingkod niadtong July 1 uban ang tabang sa 11 LGUs.
Dugang ni Kuya Gob nga ang Oplan TABANG gihatod sanglit duna’y taga barangay nga dili moadto ug hospital ug aron sab ilang madawat ang mga serbisyo nga dental, birth certificate registration, serbisyo legal, LTO, Philhealth ug daghan pang uban.
“Wala ta’y undang paghunahuna kung unsang serbisyo angay ihatod kaninyo kay mao na’y among trabaho isip inyong elected officials. . .Ang atong congressman Aldu Dujali daghan kaayo siya’g proyekto nga gihatag dire sa Samal for 2020. Ug ako pod sa probinsya naa pod ko’y daghang proyekto para dire sa Samal, Talicud, Babak, Kaputian ug Peñaplata. Mao ni among gipaningkamotan serbisyo sa gobyerno nga maabot gyod sa katawhan,” pasalig ni Kuya Gob uban ang awahg sa taga barangay nga i-follow-up lang ang ilang hangyo kung kini wala pa moabot.
Gawas sa hospital ug imprastruktura, dugang gipahibalo ni Kuya Gob ang plano sa pagpalambo pa sa turismo sa probinsya ilabina sa Samal.
“By 2020 naa ko’y proposal mao ning kuyog ang atong department heads nga atong palamboon ang turismo sa Samal, apil didto sa mainland. Kay kung molambo ang atong turismo daghan ug kita. Maghimo ta ug eco-tourism package tour gikan didto sa Tagum paingon sa Kapalong, unya ang turista last nilang adtoan ang Samal. Sa Talicud naay underground river, sa Baga Cave, naa na sa yuta ni Ayuste. Amo nang adtoan, taas daw na kaayo, naay waterfalls amo nang i-develop para moadto ang turista didto local ug foreign tourists. Mao na’y giingon nako nga One Team, One DavNor,” pagseguro sa gobernador nga gisugat ug kahinangop sa taga isla.
Ang Oplan TABANG maoy panagtapo sa mga serbisyo sa probinsyal nga panggamhanan sa Davao del Norte ug nasyonal nga mga ahensya kauban ang mga pribadong organisasyon aron mahatod ang mga serbisyo ilabina sa mga dapit ilawom sa Geographically Isolated and Depressed Areas (GIDAs).
