“Gituman gyod ni Kuya Gob ang iyang mga plano. Ako nalipay kay niabot gyod, dire sa Kaputian giuna. Dili lang ni medical mission, kumpleto mga services. Kini dakong pasalamat uban sa akong vice mayor, mga opisyales. Timing ang pag-abot kay di man lang ni medical mission, information drive pod labi na sa mga panahon karon nga sagunson ang linog. Makatabang ni ma-aware unsa ang dapat himoon kung naay linog,” matod ni IGACOS Mayor Al David Uy nga nagtug-an sab nga gideklarar na ilawom sa State of Calamity ang tibuok syudad gumikan sa sobra P110 milyones nga danyos.

Gipasalig ni Mayor Uy nga andam mopaluyo ang iyang administrasyon sa mga programa sa probinsyal nga panggamhanan hinungdan nga nakab-ot ang Seal of Good Local Governance sa probinsya ug syudad.

“Kami dire sa Samal kanunay nagsuporta sa probinsya. And of course my congratulations to the province kay nakuha ang Seal of Good Local Governance, nakuha pod sa atong syudad. Sa tibuok Region XI, Davao del Norte lang ang nakakuha. Sa Region XI pod duha lang ka syudad ang nakakuha, Digos ug Samal Island lang. Magtinabangay lang ta ug hinaut dili lang kini ang mga programa nga ihatag sa atoang provincial government,” dugang sa mayor.

Si Provincial Administrator Engr. Josie Jean Rabanoz ang nagpasabot nganong miabot ang Oplan TABANG.

“Kining Oplan TABANG mao ni pamaagi nga ipaabot ang serbisyo sa gobyerno duol sa katawhan. So instead nga kamo ang moadto sa Kapitolyo, health center, hospital ug other agencies, kami ang nang-anhi dire para itunol kaninyo ang mga serbisyo. . Out of the 46 barangay, giuna nato ang lima. Basin matingala ang ubang barangay nganong wala sila giapil? Sa next year naa na pod ta’y another round of Oplan TABANG, lahi na pod nga barangay ang atong tagaan ug serbisyo. Pero dili pasabot nga dili mo welcome whenever naay moabot sa another area,” pasabot sa DavNor administrador.    

Si Donatilla nga taga Talicud mitabok gyod aron magpa-check-up ug mangayo’g tambal.

“Ang ako lang kanang tambal. Kay sukad namatay akong bana kining akong abaga pikas mao gyod ni akong gibati. . Maoy akong gi-anhi kay naa tingali mga tambal. . Salamat Gob Edwin kay gitinuod jud,” matod ni Donatilla.

Si Annalie Rapanot nga natudloan paghimo ug sardinas mapasalamaton sab.

“Ang cleanliness, ang pagkuan sa isda nga dili siya dali madubok, tapos makatabang pod sa akong bana nga mag-negosyo. Sa tanang nag-kuan dire, labina ni congressman, si gob, mayor daghan jud kaayong salamat nga gitudloan mi mga babaye nga pwede namo matabang sa among bana nga maka-income,” matod sa ginang.

Gidugok gyod pag-ayo ang libreng serbisyo medikal ilabina nga gikalipay kay libre pod ang mga tambal.

“Pasalamat ko tanan sa mga doktor, si Gob Jubahib nga nakatabang sila. Nagpasalamat jud mi’g dako nga nagserbisyo dire sa Samal,” matod ni Marilyn nga taga Kaputian.