NAGHIUSA sila Davao del Norte Gobernador “Kuya Gob” Edwin Jubahib, Davao de Oro 2nd District Congressman Ruwel Peter Gonzaga, Mayor Arnel Sitoy ug mga opisyales, 60 IB ug kapolisan sa Laak ug DavNor aron mahatagan ug solusyon ang insurhensya nga nag-apektar sa duha ka gatos nga pamilya ilabina sa taga Purok 9B ug 9A sa Igangon, San Isidro.

Human sa paghinabi sa mga apektado didto sa municipal hall sa San Isidro (Enero 7, midesisyon ang mga opisyales nga butangan ug detachment didto sa Cebole, Kapatagan (Laak), Igangon ug Napungas (San Isidro) aron hatagan ug seguridad ang mga apektado.   

Kahinumduman nga niadtong Disyembre 12, gipatay ang mag-amahan nga Paterno ug Dino Kaso, taga Purok 9B, Igangon sa mga rebeldeng New People’s Army (NPA) didto sa ilang umahan nga sakop sa Kapatagan, Laak. Misamot ang kahadlok sa mga silingan sa gipatay tungod sa gikataho nga “nakalista sila” ug sa ilang namatikdan mga armadong tawo nga nagsuroy-suroy sa ilang umahan hinungdan nga dili na sila makaadto aron pag-harvest sa ilang mga produkto.     

“Naanhi mi diria tungod kay ang among bukid di nami kaadto, nahadlok mi tungod sa panghitabo. Among silingan gipatay maong nahadlok mi mosulod didto. . . Naay grupo nga nagsuroy-suroy ug dili ma-identify kung pulis, sundalo o NPA ba tungod kay nag-sibilyan ug armado,” pahayag sa chairman sa Purok 9B ug mga kauban.

Matod ni Laak, DavOro, Chief of Police Diwata nga ang kamatayon sa mag-amahan hinungdan sa pagduda sa mga NPA nga sila ang nag-traydor kang Kumander Jeger (Marjon Tabak), dako nga lider sa NPA nga naglihok sa Laak, hinungdan nga nakuha kini sa mga sundalo. 

“Sugod karon, nagpa-request ko sa atong 60IB, sa atong 10th Infantry Division, kang Major General Jose Faustino nga magbutang ta’g detachment sa lugar nga inyong giumahan kuyog ang PNP-- sa Cebole sa Kapatagan, sa Igangon, sa Napungas, para aduna na mo’y security,” pasalig ni Kuya Gob Edwin Jubahib.

Hinuon aron molungtad ang kalinaw ug kahusay, gipangayo sa mga opisyales sa gobyerno ang bug-os nga kooperasyon sa mga apektado.

“Una, akong ipasabot sa inyo nga ang seguridad is everybody’s concern. Atoa nang tanan, dili lang kay sa sundalo, sa pulis. . Ang ako lang gyod hangyo kanunay nga di man kinahanglan nga makig-patay sa NPA. Ang kinahanglan namo nga mo-report lang unta mo. . Kasabot mi uban diha sa inyo paryente ninyo. What I am encouraging is all of you to help us facilitate nga mag-surender sila. . Mao bitaw’ng maipit mo kay inyong silingan, inyong paryente. Kasabot mi di gyod kaya ninyo ibaligya inyong paryente. . Mao nang akong hangyoa sa inyoha, tabangi mi nga pa-surenderon nato. Kay mas daghan ta’g mahimo kung manurender. . Among hangyo sa inyoha, tabangi sila. . . Dili mi ninyo kontra,” matod ni 60IB Col Ombos.  

“Ang atong gobyerno karon wala gyod mo pasagdi. . Parehas mi’g direksyon. Ang among direksyon unsaon mo paghatag ug tabang. . Gikinahanglan namo ang inyong kooperasyon. . Kung naa mo’y mga paryente nga naa nag-NPA hangtod karon, ug naa mo’y mga nailhan nga pamilya nga connected sa CPP-NPA, panahon karon nga mohatag mo ug kooperasyon, nga mohatag mo’g impormasyon sa amoa. Ikaduha, inyo silang kampanyahan, inyo silang estoryahan nga undang na anang trabahoa. Balik na ta sa gobyerno,” pahayag ni Kuya Gob nga nagpasalig sa “safety” niadtong mo-surender.

“Kami nga naa sa gobyerno isa lang ang among pangandoy. . kalamboan lang. Kung naa ta’y problema nga masugatan, isumbong sa taga-gobyerno. Kung dili magpakabana ang gobyerno unsa ma’y kaugmaon nang inyong mga anak. Sige daw, gyera-gyera ta. Kinsa ma’y maapektohan? Mao na isa ra gyo’y atong tumong, kalinaw. Kinsa ma’y maghatag sa kalinaw. Isa ra gyod, ang gobyerno. Unsa ma’y among trabaho? Tabangan ang kasundalohan aron makuha ang inyong kasingkasing ug hunahuna. Karon naipit na mo, asa man mo nisumbong? Di ba kang Governor Edwin, kang Mayor Sitoy. . Unsaon na lang nang inyong mga paryente kung magpadayon ta ani. Unsa ma’y pilian nato? Kinabuhing malinawon nga naay ugma ang inyong mga anak o samok? Karon no choice ta. Misandig ta sa gobyerno,” pahimangno ni DavOro Congressman Ruwel Peter Gonzaga nga nagbilin pa ug libreng “insurance cards” sa mga apektado.

Gilaoman sa mga opisyales nga mohatag sa kooperasyon ang katawhan nga duna pa’y gipabalon nga tig P1,000 cash ang tanang apektado nga mitambong sa peace forum.

 

 

 

 

DavNor News