NANAWAGAN ang Davao del Norte Provincial Health Office nga hatagan sa eksaktong nutrisyon ang mga bata sa unang 1,000 ka adlaw gikan sa pagbuntis hangtod na sa edad nga 2 ka tuig.
Sa ikaduhang hugna sa “USAPangkalusugan,” usa ka binulan nga programa sa Provincial Health Office nga naghatag kahibalo sa katawhang Dabaonon labot sa kahimsog ug panglawas, gipaabot sa mga personahe sa PHO ang kahinungdanon sa unang 1,000 ka adlaw sa bata nga gitawag pa gani ug “golden windows of opportunities.”
“Because this is the time wherein intervention, that means shield, the maximum protection of a child’s growth and development,” matod ni Ms Risa Tindoy, Provincial Nutrition Staff.
Sa pagsugod sa 1,000 ka adlaw (panahon sa pagbuntis), ang bata nga anaa sa tiyan magkuha ug mga sustansya gikan sa iyang inahan hinungdan nga angayan gayod nga eksakto ang gikaon sa nagbuntis. Sa dihang kini ipanganak, ang gatas sa inahan mao ang pinakamaayo nga pagkaon sa bata bisan sa labing menos 6 ka bulan sanglit magsilbi usab kining “immunization” (panagang) batok sa mga sakit. Gawas sa gatas sa inahan, ang bata nga nag-edad ug 6 ka bulan hangtod 2 ka tuig nagkinahanglan ug pagkaon nga
puno sa sustansya alang sa paglambo sa iyang lawas ug utok.
Ang kaayohan sa paghatag sa hustong nutrisyon sa sayong bahin sa kinabuhi makahatag ug dakong kaayohan sa bata bisan hangtod sa iyang pagkahamtong.
Sa usa ka surbi nga gihimo sa Food Nutrition Research Institute Department of Science and Technology (FNRI-DOST), sa mga batang Pinoy nga nag-edad 0-5 ka tuig, 2 sa 10 ka mga bata maoy ubos ang timbang samtang 3 sa 10 ka mga bata sa samang pangedaron ang wala motubo tungod sa kakulang sa sustansya. Ang mao gihapon nga surbi nag-ingon sab nga ang mga bata nga ubos ang timbang adunay hinay nga pagtubo, sakiton ug mugbo ang nakab-ot nga grado sa eskuylahan.
Ang pangedaron nga 6 ka bulan hangtod 2 ka tuig giila sa FNRI nga mao ang higayon diin nagkinahanglan pag-ayo ang mga bata sa husto nga nutrisyon sanglit niini nga pangedaron sab nga ang bata dali matakdan ug magkasakit nga makaapektar sa iyang pisikal ug mental nga pagtubo.
Ang probinsya sa Davao del Norte minunot sa katibuk-ang pagsaulog sa bulan sa Hulyo ingong “Nutrition Month.” Bisan pa kung nakab-ot niini ang 3.14% nga malnutrition rate, desidido ang probinsyal nga kagamhanan pinaagi sa PHO nga pakusgan pa gyod ang ilang kampanya bisan kung ubos kini sa target sa
Minimum Development Goals (MDG) nga 13.6% malnutrition rate under 5 years old niadtong 2015. (pioDavNor)
