Gitigom ni Kuya Gob Edwin I. Jubahib ang tanang Mayors, Vice Mayors ug Sangguniang Panlalawigan Members kauban si Vice Governor Rey Uy ug mga Provicial Government Department Heads aron mas pahugtan pa ang seguridad sa probinsya batok sa hulga sa gikahadlukang African Swine Fever (ASF) ug Corona Virus Disease 2019 (CODIV-19) niadtong gabii sa Pebrero 12, 2020 didto sa Tahanan ng Punong Panlalawigan.

Gipakita sa mga lokal nga opisyal ang ilang dakong suporta sa lakang ni Kuya Gob Edwin. Gikauyonan nga ang tanang syudad ug munisipyo sa Davao del Norte muhatag ug dugang mga tao nga mutabang sa mga empleyado sa probinsyal nga panggamhanan aron mapakusgan pa ang seguridad sa mga entry points sa probinsya.

Sa kasamtangan, anaa sa Green Zone ang Davao del Norte nga nagpasabot nga luwas ang mga baboy ug pork by-products nga nag-gikan sa probinsya.

Nanawagan usab si Department of Agriculture Regional Director Ricardo Oñate, Jr. nga anaa usab sa maong tigum, nga kinahanglan magtinabangay ang tanan gikan sa barangay hangtod sa probinsyal nga lebel aron dili makasulod ang ASF. Gisuguro pud niini ang tanan nga andam muhatag ang ilang ahensya sa mga impormasyon kabahin sa ASF.

Sa laing bahin, nagpakanaog ug Health Advisory si Kuya Gob Edwin aron pahimangloan ang katawhan sa mga dapat buhaton aron mahalikay sa Corona Virus Disease 2019 o CODIV-19. Dugang niini, giawhag niya ang mga lokal nga opisyal nga makigtambayayong sa Provincial Health Office ang mga City ug Municipal Health Offices apil na ang mga barangay aron sa pag-monitor sa mga katawhan.

Alang sa kaluwasan sa tanan, gisugyot ni Tagum City Mayor Allan Rellon ang pagkanselar sa tanang matang sa kalihokan nga makadani sa daghang mga tawo. Bisan pa man sa maong sugyot, buot ni Mayor Rellon nga ipadayon gihapon ang mga kalihokan nga magdala ug serbisyo medikal, sosyal ug panglawas sama sa Oplan Tabang nga dako gayud ug gihatag nga kaayohan sa Probinsya sa Davao del Norte.