Aron mas mahisgutan ug matagaan ug kasegurohan ang paghatag ug pag-implementar sa mga proyekto nga dunay kalambigitan sa tinguha sa administrasyon ni Presidente Rodrigo Duterte nga maundang ang lokal nga komunismo ug armadong panagbangi, gipahitabo ang Regional Task Force-Ending Local Communist Armed Conflict (RTF-ELCAC) Workshop II didto sa Grand Menseng Hotel, Lugsod sa Davao, kagahapon, Pebrero 17.

Mukabat ug 5 Billion pesos ang mga proyekto nga posibleng maangkon sa Davao del Norte nga makahatag ug tiunay nga kabag-ohan sa kinabuhi sa katawhan sama sa mga dalan, balay tambalanan, tulunghaan, patubig, skills and capacity development training, mga trabaho, greening program, mga patubig, ug uban pa.

Gilangkuban ang panagtigum sa mga lokal nga opisyal sa Rehiyon Onse: Davao del Norte Governor Edwin I. Jubahib, Davao de Oro Governor Jayvee Tyron Uy, Davao Oriental Governor Nelson Dayanghirang ug Davao del Sur Governor Douglas Cagas; kauban ang mga mayor ug punong barangay sa 55 ka mga “priority barangay” nga ginailang Geographically Isolated and Disadvantaged Areas (GIDA).

Gipresenta sa mga local government unit ang ilang mga gisugyot nga mga proyekto nga dunay tumong nga mapalambo ang kinabuhi sa mga katawhan sa mga barangay nga gituohang dunay presensya sa mga rebeldeng CPP-NPA. Ang presentasyon sa probinsyal nga panggamhanan sa Davao del Norte gipangunahan ni Kuya Gob Edwin kauban si Kapalong Mayor Maria Theresa Timbol, New Corella Mayor Jorjan Federiso ug mga representante sa mga lungsod sa Santo Tomas ug Talaingod ug syudad sa Island Garden City of Samal ug Panabo.

Mismong si Department of Budget and Management Secretary Wendel Avisado ang misaad nga mapaabot sa gobyerno ang mga proyektong pangkalamboan alang sa rehiyon. Apan iyang gipahimangloan nga kining mga proyekto mamahimong walay silbi kung dili magpakabana ang mga komunidad ug barangay. Gihagit nya ang mga lider ug tanang nitambong sa maong tigom nga dili gyud magmahadlokon sa mga hulga sa mga rebeldeng grupo kay alang kaniya kining tanan alang gayud sa mga kabataan ug sa maayong kaugmaon sa tanan.

Ang mga presentasyon sa matag LGU giniyahan sa mga representante sa nasyonal ug panrehiyong panggamhanan sama sa National Economic and Development Authority, Department of Agriculture, Department of Education, Technical Education and Skills Development Authority, Department of Trade and Industry, Department of Labor and Employment, Department of Energy, National Electrification Administration, Department of Environment and Natural Resources, Department of Social Welfare and Development, Department of the Interior and Local Government ug Department of Health.