Gisaad ni Regional Director Allan S. Borromeo sa Department of Public Works and Highways (DPWH) XI nga masugdan na ang pag-implementar sa Samal Island-Davao City Connector (SIDC) Project sa dili madugay. Kini atubangan mismo sa mga opisyales ug mga miyembro sa Regional Development Council (RDC) XI human gisukitsukit ni Davao del Norte Governor Edwin I. Jubahib ang estado sa maong proyekto sa gipahitabong RDC XI Budget Review and Consultation, kagahapon didto sa National Economic and Development Authority (NEDA) XI, Davao City.

Ang SIDC Project kasamtangang anaa pa sa procurement stage alang sa disenyo niini. Apan gisaad ni RD Borromeo nga masugdan ang pagbuhat sa maong tulay nga anaa pa sa posisyon si Presidente Rodrigo Duterte.

Gipangusgan ni Kuya Gob Edwin Jubahib nga unta masugdan na gyud ang pagtukod sa tulay karong tuiga. Gisugyot niini nga himuon ang groundbreaking sa proyekto atol sa pagsaulog sa founding anniversary sa Davao del Norte karong Hulyo.

Ang maong sugyot hugot nga gisuportahan ni Regional Director Maria Lourdes Lim sa NEDA Region XI, RDC Chairperson ug Davao de Oro Governor Jayvee Tyron Uy ug uban pang miyembro sa RDC XI.

 

 

 

DavNor News