TUTOKAN pag-ayo ni Gobernador (Kuya Gob) Edwin I. Jubahib ang industriya sa cacao sa lungsod sa San Isidro gawas pa sa eco-turismo.
“Ang San Isidro na-recognize gyod nga kita ang mass producers sa cacao, so kinahanglan mag-focus ta unsaon nga ang atong cacao mas dako ang harvest; i-arrange nato ang mga associations sa cacao farmers para matabangan, then mag-allocate ko’g budget sa province, matabangan nga mas productive ang atong cacao farmers,” matod ni Kuya Gob nga nagtug-an nga dunay negosyante nga mo-invest, mohimo’g chocolate processing plant sa San Isidro atol sa “Panaghisgot Alang sa Kalamboan” Lunes, Pebrero 24.
Bitbit ni Kuya Gob ang opisyal sa cacao industriya sa Rehiyon XI, Val Tortor, aron matabangan ang mga mag-uuma sa San Isidro. Sa kasamtangan ang nagbunga nga cacao maglisod ug usa ka kilo nga liso inig-harvest.
“Mag-conduct ta’g training para sa mga farmers dire. . Si Mayor, nagpa-set na ko, training lang una,” matod ni Tortor.
Gawas sa pagtutok sa cacao industriya pakusgon sab sa gobernador ang eco turismo sa lungsod nga adunay bayente otso ka mga kuweba apan napulo pa lamang ang na-explore.
“Kining atong agri-eco tourism di nato ni dugayon. Sugdan dayon nato ni karong sunod bulan, tibuok probinsya ni, “Highlands to Island.” Naa ta’y budget nga gi-allocate worth 200 million pesos. Kaning atong agri-eco tourism ato ning gihatagan ug priority for development this year kay makahatag ni’g additional employment. . . Gawas sa employment daghang mga entrepreneur makasugod maninda’g kakanin,” padayong pasabot ni Kuya Gob.
Gipasalamatan pag-ayo ni Mayor Arnel Sitoy ang paningkamot ni Kuya Gob alang sa kalamboan sa San Isidro ilabina ang pag-donar sa gobernador ug luna alang sa police station ug evacuation center.
“Ang kadtong tukoran ug police station, kadtong evacuation center nga at the same time gihimo namo nga municipal gym, gi-donate na ni Kuya Gob nga land area ten thousand square meters. . . Sa iyang pagsuroy-suroy nahibalo siya unsa’y panginahanglan dire. Hinay-hinay natubag apan sa iyang giingon nga dili dayon nato mahatag ang tanan. . . Nahibalo si Gob unsa’y panginahanglan. Gidala niya ang motabang sa atong production sa cacao, naay mga trainings para modako atong production. . Mga kapitan, naay daghang programa atong probinsya, kung unsa man ang gustong himoon sa provincial government, mosunod ug magtinabangay lang ta kay sayang kaayo ang paningkamot,” pag-awhag sa mayor.
Gitaho sab ni Mayor Sitoy nga sa napulo’g tulo ka mga barangays sa lungsod tulo na lang niini ang nabilin nga wala ma-konkreto ang dalan, ang Mamangan, Pinamuno ug Kipalili, ug masaligon nga ma-konkreto kini.
Ug labot sa upat ka mga barangays nga walay Internal Revenue Allotments (IRA), gi-“taplan” una kini ni Kuya Gob.
“Upat ka barangay nga walay IRA himoon ko nang tig ten thousand, charged na sa akoa, kuhaon ninyo every first week of the month. Basta importante nako, happy mo, happy ko,” paniklop ni Kuya Gob.
