PORMAL nga gipatingog ang siren timaan sa pagsugod sa tibuok probinsya dungan nga pagpanghinlo matag kataposang Byernes sa bulan gikan alas tres hangtod alas singko sa hapon, Pebrero 28.
Kini ang unod sa Memorandum Order ni Gobernador Kuya Gov. Edwin I. Jubahib penetsaha’g Pebrero 20 nga gitawag ‘Oplan Barangay Linis.’ Napili ang Barangay Alejal sa Carmen alang sa launching.
“Magpasalamat ta nga ang munisipyo sa Carmen, ang barangay Alejal ang gi-identify sa atong probinsya sa launching sa programa alang natong tanan nga mapalayo ta sa sakit, ang simultaneous provincial-wide clean-up drive. Mapasalamaton pod ko aron ma-recall kay naa na ta ordinansa an,i that we will have a three o’clock habit every Friday; limpyohon ang dapat limpyohon. Ato nang ibutang sa hunahuna ug kasingkasing. This will become a habit until it become our way of life, mangita na ta kada alas tres,” matod ni Carmen Mayor Virgie Perandos ngadto sa mga opisyales ug residente sa barangay Alejal.
Kahinumduman nga sa unang bulan sa paglingkod ni Kuya Gob, nagdeklarar ang LGU Samal ug State of Calamity tungod sa dengue. Iyang gipasabot nga gikinahanglan gayod ang panglimpyo sanglit kini pa ang napamatud-ang pinaka-epektibong paagi sa pagsumpo sa sakit nga dala sa lamok.
“Kining clean-up drive nato simultaneous nga ginahimo, usa na ni ka 3:00 o’clock habit every last Friday of the month. Sa pag-assume nato sa office problema kaayo ning dengue. . Tungod ana, i-launching nato ning Oplan Linis. Buot pasabot ang tanang posible nga balayan sa lamok nga nagdala sa dengue, mao ni ang atong i-eliminate. Manawagan ta sa tibuok probinsya sa Davao del Norte, from provincial government down to barangay level nga kita mismo ang moadto sa kabalayan, pahibaw-on ang mga household,” matod ni Kuya Gob nga naghisgot nga ang mga botelya, buko, ligid ug bisan unsa nga mapondohan ug tubig kinahanglan ikulob para di makapangitlog ang lamok.
Lakip nga giawhag sa gobernador ang pag-atiman sa mga kanal ilabinang kadtong dunay napondong tubig.
“Kita nga barangay official, kamo nga naa dire ang una makakita. Kung naa mo nakita stagnant nga canal, magbayanihan, ato nang ablihan para di mopondo ang tubig. Ang dagko nga canal, i-letter na sa akoa kay padad-an ta na ug equipment para ma-deretso ang trabaho. Magtinabangay ta tanan, ug mo-cooperate. Isip inyong governor, ako nang gi-ako nga obligasyon ang inyong panginahanglan dinhi sa barangay,” dugang pasabot sa gobernador ng masa.
Sanglit manglimpyo na man lang, gidasig sab ni Kuya Gob nga mananom ug gulay diha sa ilang mga tugkaran ingon sa naunod sa iyang laing Executive Order “Gulayan sa Tugkaran” aron masumpo dili lang dengue lakip na ang kawad-on ug malnutrisyon ug malikayan ang kaulaw nga magsige’g pangayo ug gulayon sa silingan.
