SUPORTADO ni Gobernador Kuya Gov. Edwin I. Jubahib ang Kasalan ng Bayan nga gipasiugdahan sa Syudad sa Tagum atol sa ilang pinaka-unang Love Festival Pebrero 28.
Si Kuya Gob ug Mayor Allan Rellon maoy apil sa mga “ninong” sa usa ka gatos ug unom ka paresan nga naghimong legal sa ilang panagtipon.
“First time ni nga Love Festival pero every year naa gyod ta’y Kasalan ng Bayan quarterly kaya lang di gyod kaayo nimo mahatagan ug over-emphasis mao nga gisulod nato sa festival, mas grandeur, mas well-participated, mas pahimutang labina nga miapil si governor. Naa siya’y items panghatag, ang food, naka-gaan-gaan sa Tagum. Ni-augment siya’g pagkaon, naa siya’y gifts para sa ilaha,” matod ni Mayor Rellon dihang gi-interbyu.
Tumong sa probinsyal nga administrasyon ni Kuya Gob ingon man sa tanang LGUs sa Davao del Norte nga mamenosan ang mga “mansibado” (cohabitation) ug mahimong legal ang estado sa ilang mga anak.
Gawas sa daghang kaayohan, ang legal nga kaminyoon magpasayon sa mga magtiayon ug ilang pamilya nga makadawat mga serbisyo gikan sa gobyerno.
“Sa tinuod lang kini nga programa ni Mayor Allan ug Vice Mayor Lingling gihimo namo ni aron nga ang mga magtiayon nga nag-ipon kinahanglan gayod nga makasal. . Unang-una, para ma-legal ang inyohang pagpuyo. Ikaduha, para sab ang inyong mga anak mahimong legal. Ikatulo. Dili mo basta maka-avail sa mga government services. .kay kung way kasal unsaon pagkuha sa mga benefits sa gobyerno, sa registration sa Universal Health Care?” pagpasiugda ni Kuya Gob ngadto sa mga kinasal nga halos ang tanan aduna na’y mga anak sa ilang panagtipon.
Dili lang sa Tagum City, kabahin sa programa ni Gobernador Edwin Jubahib nga Oplan Tapok sa Barangay Alang sa Nanginahanglan ug Galisod (Oplan TABANG) ang libreng Kasalan ng Bayan matag libot niini sa mga munisipyo ug syudad sa probinsya.
Gawas pa niini, sa bag-ohay lang nahuman nga pagbisita sa mga LGUs sa “Panaghisgot Alang sa Kalamboan” para agri-eco turismo nga programa niadtong Pebrero 24, kusganong gipasiugda ang legal nga pagpakasal ug pagpa-rehistro sa mga kabataan aron dili maglisod pagdawat sa mga benepisyo ilabina sa “zero-billing” nga pagpatambal diha sa tanang hospital sa gobyerno sa probinsya.
