NABAWASAN na pod ang gidaghanon sa mga mansibado (cohabitation) nga magtiayon sa Davao del Norte lakip na ang illegitimate nga mga bata dihang nagpahigayon ang Braulio E. Dujali ug Kasalan ng Bayan, Byernes, Pebrero 6.

59 ka paresan ang naghimong legal sa ilang panagtipon gawas pa sa laing 106 sa Kasalan ng Bayan sa Tagum City niadtong Pebrero 28.

Tumong sa administrasyon ni Gobernador Kuya Gov. Edwin I. Jubahib nga ang tanang nag-ipon nga walay kasal himoong legal aron mapadayong hapsay ang paghatod sa mga social services sama sa libreng pagpatambal nga nagkinahangla’g legal nga mga dokumento sama sa marriage ug birth certificates.

“Kini nga program gihimo tibuok Davao del Norte. Mga municipal mayors, city mayors atong gisuportahan kining programaha Kasalan ng Bayan tungod unang-una, para ma-legal inyong kaminyoon, mahimong legitimate. Ikaduha, para ma-avail ninyo ang serbisyo sa atong gobyerno. . Kung wa mo makasal, dili ka ka-claim sa tanan nga benefits. . Ang aduna gyo’y dakong benepisyo walay lain ang inyong anak. Legal na ang inyong anak kay ang ginikanan legal nga nakasal. Ang inyong anak pwedeng ma-rehistro, maka-kuha ug birth certificate, madawat na ang benepisyo sa gobyerno,” pasabot ni Kuya Gob ngadto sa 59 ka magtiayon.

Kahinumduman nga sa paglibot sa DavNor “Panaghisgot Alang sa Kalamboan” sa tibuok probinsya, gihimong kabahin sa diskusyon ang kaimportante sa legal nga dokumento sa kaminyoon ug sa kapanganakan.

“Karon gi-emphasize nato sa probinsya nga tanan makakuha ug Universal Health Care para sa atong hospital nga zero-billing. Kung wala mo’y Universal Health Care dili gihapon ninyo ma-avail ang zero-billing. Problema ni dili lang sa Dujali, tibuok probinsya sa Davao del Norte. Kung wa pa mo makasal, kuhaan ang anak, kuhaan pa gyod mo. Karon nga nakasal namo, isa na lang kang health card ang kuhaon, ma-cover na ang entire family,” padayong pasabot ni Kuya Gob nga ninong sab sa tanang kinasal.

“Isa sa rason nganong naay Kasalan ng Bayan para mababa ang mga illegitimate children sa ilahang civil registration sa birth. . Dako kaayo atong pasalamat sa atong gobernador Kuya Edwin Jubahib sa pagsuporta sa atong Kasalan ng Bayan, sa paghatag ug libreng government fees ug regalo. Kay dili mahitabo ning atong Kasalan kung wala ang tabang sa probinsya nga gipangunahan sa atong gobernador Edwin Jubahib. Of course sa Ninong ng Bayan LYR ang principal sponsor, ang LYR companies nga nag-shoulder sa ubang fees,” matod ni Braulio E. Dujali Mayor Atty. Leah Moral-Romano.

Todo suporta ang LYR Group of companies sa libreng Kasalan ng Bayan nga nagdasig sa mga magtiayon nga mahalon, giyahan ang mga anak aron dili mahimong problema sa katilingban. Ninong sab sa tanang magtiayon ang CEO nga si Larry Rubinos, Sr. ug “kumpare” ni Kuya Gob.

“Walo na ka tuig nag-sponsor ko’g Kasalan ng Bayan. . Nag-estorya mi ni Pare Governor, ingon nako Pre, pwede nato ni himoon dili lang sa Dujali, tibuok Davao del Norte mag-partner ta. Kadtong wa’y kasal atong ipakasal. Kay kung way kasal kabit lang, nagpuyo-puyo. . Kamong mga kinasal mahala ang inyong pamilya. . I hope walay addict, walay nag-droga. Guba inyong pamilya panahon nga mosulod mo ana. . Pinaka-kalaban sa atong katilingban karon ang droga. . Panggaa ninyo inyong barangay, panggaa ninyo inyong lungsod. Mag-cooperate mo sa gobyerno, dili mag-pabadlong. . . Ang kalamboan sa nasod magasukad sa pamilya,” pagtambag ni CEO Larry Rubinos.

Gawas sa Tagum City ug BE Dujali, ang Kasalan ng Bayan padayong ipahigayon sa ubang LGUs.