GIPASALAMATAN gayod sa Acting Regional Director sa Philippine Statistics Authority (PSA) XI Pepito Amoyen sa hiniusang paningkamot sa probinsyal nga panggamhanan ni Gobernador Kuya Gov. Edwin I. Jubahib ug mga mayores aron ma-legal ang mga nagpuyo-puyo nga magtiayon.
Pinaagi sa libreng Kasalan ng Bayan dili lang na-legal ang kaminyoon sa mga mansibado (cohabitation) kundili apil na sab nga ma-legal ang Certificate of Live Birth sa mga bata.
“Kini nga program gihimo tibuok Davao del Norte. Mga municipal mayors, city mayors atong gisuportahan kining Kasalan ng Bayan tungod unang-una, para ma-legal inyong kaminyoon, mahimong legitimate. Ikaduha, para ma-avail ninyo ang serbisyo sa atong gobyerno. . Kung wa mo makasal, dili ka ka-claim sa tanan nga benefits. . Ang aduna gyo’y dakong benepisyo walay lain ang inyong anak. Legal na ang inyong anak kay ang ginikanan legal nga nakasal,” pasabot ni Kuya Gob ngadto sa 59 ka magtiayon didto sa Braulio E. Dujali Pebrero 6.
Labaw nga gipasiugda ni Acting RD Amoyen ang kaimportante sa maong mga dokumento para sa national ID kay ang legal nga kaminyoon kinahanglanonon aron ma-legitimate ang mga anak nga natawo sa wala pa makasal pinaagi sa ‘Legitimation By Subsequent Marriage.’ Kini sab lig-ong basehanan sa “Family Tree.”
“Ang pinaka-primary nga dokumento para makakuha ug Philippine ID ang Certificate of Live Birth. I-process daan ninyo kay mao gyod na ang pangitaon sa Philippine Statistics Authority nga gisangonan sa atong pangagamhanan nga magpatigayon sa Philippine ID Registration. Ang timeline kinahanglan mahuman sa PSA by July 2022, pagbaba sa atong Presidente Rodrigo Roa Duterte,” matod ni Amoyen.
Sa Kasalan sa Dujali, gipahibalo sab sa Acting PSA XI RD nga ipahitabo ang census Mayo, 2020.
“Karong Mayo 2020 pagahimoon ang the biggest civilian operation sa Philippine Statistics Authority nga mao ang Census on Population and Housing. I am encouraging nga kung adunay enumerator, public school teachers makaabot sa inyong balay, I am asking you to cooperate to please answer, palihug tubaga ang pangutana. Gikinahanglan nato ang datos sa census dili lang sa social economic development planning kundili usa sab ni nga gibasehan sa Internal Revenue Allotment for development fund sa matag Local Government Units. Ginapangayo ang kooperasyon ang mga opisyales sa Dujali down to the barangay levels,” pahibalo ni Amoyen nga dugang nagpahibalo sab nga Community-Based Monitoring System (CBM) gisangon sab sa PSA sa 2022 aron ma-monitor ang kahimtang sa kapobrehon.
Ang Certificate of Live Birth ug Marriage magamit sab sa daghang paagi lakip na ang pagtrabaho gawas sa Pilipinas (abroad).
